Presidenti Thaçi i ka kushtuar një tjetër status synimit për një marrëveshjeje historike me Serbinë në funksion të një paqeje të qëndrueshme mes dy vendeve. Por në rreshta dhe mes tyre, kreu i shtetit kosovar ka përcjellë mesazhe kritike të cilat shkojnë, siç nuhatet, drejt qeverisjes së Haradinajt.
Thaçi përmend togfjalëshin “akte populiste” në mesazhin e tij, që duket sikur përcjellin padakortësinë me vendimin e Haradinajt për rritjen e taksës doganore 100 përqind ndaj produkteve serbe.
“Derisa po përmbyllim dekadën e dytë të çlirimit, pashmangshëm duhet të reflektojmë për të arriturat, sfidat dhe trashëgiminë që do t’ua lëmë pas fëmijëve tanë.
Unë jam shumë krenar për të arriturat tona si gjeneratë. Por, do të ishte e pafalshme, që brezave të rinj t’ua lëmë peng të ardhmen për shkak të akteve populiste dhe mungesës së guximit për të përmbyllur konfliktin shekullor me Serbinë”, shkruan Thaçi.
Ndërkohë, presidenti deri më sot nuk komentuar vendimin ekstrem, i cili ka bllokuar procesin e dialogut e vënë Prishtinën nën presionin e Brukselit.
Beogradi thotë se pa heqjen e taksës nuk ka rinisje të dialogut, ndërsa Haradinaj këmbëngul se pa njohjen e Kosovës nga Serbia nuk do ketë heqje të taksës. E deri më sot nuk ka asnjë shenjë të lëshimit pe prej palëve.
Thaçi shkon më tej kur thotë se me një marrëveshje që do çonte në njohje reciproke, siç ai beson, do ndryshojë dhe qeverisje. Pra, një kontekst i ri me tjetër qeverisje. E kjo, pasi Kadri Veseli nga radhët e PDK-së, ish-partisë së tij, shpalli ambicien për kryeministër.
“Për më tepër, njohja reciproke mes Kosovës dhe Serbisë do të niste edhe një proces thelbësor të transformimit të lidershipit dhe modelit qeverisës në vendin tonë. Besoj shumë që pas marrëveshjes do të fillojë një epokë e re, ku askush më nuk do të mund të pretendonte të fitonte vota në emër të betejës së papërfunduar politike me Serbinë.
Kosova ka nevojë për këtë transformim. Për institucione më efektive, qeverisje që në qendër të vëmendjes ka reformat, zhvillimin ekonomik dhe mirëqenien sociale. Këtë ua kemi borxh fëmijëve tanë”, shkruan Thaçi. /tesheshi.com/
