Kreu i Bashkësisë Islame të Bosnjës, Husein Kavazoviç, përfundoi një vizitë dyditore te homologët në Kosovë, gjatë së cilës, u takua me boshnjakët në Kosovë, por dhe bisedoi me zyrtarët më të lartë shtetërorë të Kosovës, përfshirë dhe kryeminsitrin Kurti.
Kavazoviç tha se Kosova tregon se lidhja mes dy popujve nuk ka qenë asnjëherë e diskutueshme. Ata ndanë një fat të ngjashëm, e ndërtuan të ardhmen e tyre në paqartësi të ndryshme dhe se sot kanë edhe një përgjegjësi të veçantë ndaj fesë me të cilën jetojnë shumica e boshnjakëve dhe shqiptarëve.
“Boshnjakët dhe shqiptarët janë dy popuj në Evropë që e kanë për obligim të zhvillojnë vlerat islame në Evropë, ta tregojnë Islamin në Evropë si një kulturë autoktone që u zhvillua në këto zona. Është, në radhë të parë, sigurisht, kultura e vendosjes së lidhjeve me të tjerët, por edhe mes myslimanëve. Është një kulturë që shtrin dorën dhe dëshiron bashkëpunim. Shpresojmë që së bashku ta afrojmë Islamin edhe më shumë me mjediset ku jetojmë dhe mjediset me të cilat biem në kontakt. Ne duhet të qëndrojmë autentikë, të zhvillojmë identitetin tonë dhe, sa më shumë që të jetë e mundur, t’ua tregojmë atë të tjerëve. Jemi marrë vesh që këto takime të vazhdojnë dhe të intensifikohen sistematikisht”, tha njeriu që menaxhon jetën islame të Bosnjës.
Ai theksoi rëndësinë e bashkëpunimit të përbashkët, për të cilin kishte diskutuar një ditë më parë, ndër të tjera, me kryeministrin e Kosovës, Albin Kurti.
“Ishte një bisedë cilësore dhe e këndshme. Kryeministri Kurti është një lider i shquar, por mbi të gjitha një njeri i madh. Ai i kupton marrëdhëniet në rajon dhe e di se sa e rëndësishme është që Bosnja dhe Kosova të lidhen, boshnjakët dhe shqiptarët të lidhen dhe ky duhet të jetë prioriteti ynë kryesor në zhvillimin e bashkëpunimit rajonal”, tha Kavazoviç. /tesheshi.com/
