Mesazhet e fundvitit përcjellë nga dy krerët e shtetit shqiptar, presidenti Nishani dhe kryeministri Rama, kanë dalluar në ca detaje këtë vit. I pari nuk është dorëzuar fantazisë letrare siç ka ndodhur dy vitet e fundit duke qenë më prozaik e njëherësh më politik. Ajo që veçon më pas është droga në të. Për kreun e shtetit, kanabisi na ka nxirrë faqen gjatë 2016-ës.
“Viti 2016 ishte një nollë e zezë përsa i përket kultivimit dhe trafikimit të kanabisit në Shqipëri”, ka thënë Nishani.
Ndërsa mesazhin e shefit të ekzekutivit e ka përshkruar një mea colpa. Me një aliteracion frazeoolgjik, Rama u është drejtuar me ndjesë shqiptarëve:
“Ndjesë çdo shqiptari që është përballur me padrejtësi shtetërore gjatë këtij viti. Do luftojmë që vitin e ri shteti të jetë më i drejtë për të gjithë. Ndjesë kujt ka rënë viktimë e pushtetit të korruptuar e të babëzitur gjyqësor. Viti i ri do të jetë më i miri për drejtësinë në këta 25 vjet dhe i pari i një zinxhiri vitesh në vazhdim për ndërtimin e një drejtësie që do garantojë barazi para ligjit…
Ndjesë çdo pensionisti që sot s’ka kush i thotë gëzuar dhe viti i ri i ngjan si një përsëritje e mundimshme e të vjetërit. Kemi bërë sa kemi mundur, por jo aq sa do të donim të bënim për të moshuarit. Nuk do ta rresht përpjekjen për të bërë më shumë për ta gjatë vitit të ri…
Ndjesë familjeve që jetojnë në ato fshatra që era e Rilindjes Urbane nuk i ka prekur. Por i siguroj se viti i ri do ta shtrijë më tej gjurmën e ndryshimit…”, kanë qenë disa nga frazat e mesazhit të kryeministrit. /tesheshi.com/
