Ambasadorja amerikane Yuri Kim pranoi se Reforma në Drejtësi ende nuk ka përmbushur pritshmëritë e popullit, por nga ana tjetër ka trembur politikanë.
“Reforma në drejtësi ka bërë përparim që mjafton për të trembur ata që nuk e duan atë por ende jo aq sa të kënaqë popullin shqiptar. Mendoj se është vërtet e rëndësishme që ne që e mbështesim reformën në drejtësi, populli shqiptar, Shtetet e Bashkuara, të mos dorëzohemi, të mos çorientohemi, dhe të mos shpërqendrohemi në këtë pikë kritike. Duhet të shtyjmë përpara”, tha ajo gjatë një interviste për A2CNN.
“Unë kam udhëzime të qarta nga Uashingtoni që kjo çështje mbetet prioritet dhe unë kam në plan t’i zbatoj ato”, theksoi Kim, duke garantuar se angazhimi amerikan do jetë maksimal në drejtim të ecjes para e rezultateve të reformës.
Për gruan që përfaqëson Uashingtonin në Tiranën, “disa do të donin që reforma në drejtësi të sillej rrotull e rrotull në një rreth, si kali në lëmë”.
“Ajo që na duhet është që reforma në drejtësi të ecë përpara dhe, siç e kam thënë më parë, është diçka që nuk do të jetë e përsosur menjëherë. Nuk do të jetë e lehtë, nuk do të jetë e shpejtë, por e dini çfarë? Është e rëndësishme, është e rëndësishme për të ardhmen e Shqipërisë. Ndaj njerëzit duhet të mbeten vigjilentë, duhet të vazhdojnë të kërkojnë ndryshim dhe shpresoj që nuk do të dorëzohen sepse kemi bërë kaq shumë rrugë dhe do të ishte tragjike të hiqej dorë tani”, theksoi Kim.
Ajo ripohoi dhe një qëndrim të para pak ditëve, ku aludoi se ka një konspiracion ndaj reformës, për ta pamundësuar atë.
“Mendoj se mund të ketë pasur njëfarë të vërtete tek ato thashetheme dhe, siç thashë në cicërimë, në fakt jam mjaft e drejtpërdrejtë, nuk jam diplomate shumë e mirë, them atë që synoj të them. Shpresoj vërtet që nuk ka pasur të vërtetë në ato thashetheme dhe, pasi unë shpreha këtë pikëpamje, shumë aktorë të rëndësishëm dolën publikisht dhe afirmuan se nuk kishte të vërtetë në ato thashetheme. Ndaj jam shumë e lumtur të dëgjoj që është ashtu”, theksoi ambasadorja amerikane.
Ndër të tjera, znj.Kim vlerësoi ata që nuk dorëzuan mandatet dhe vijuan jetën parlamentare, duke veçuar deputeten Hajdari.
“Mendoj se Rudina dhe disa persona të tjerë kanë një detyrë shumë të vështirë. Ata që qëndruan në parlament bënë gjënë e duhur. Siguruan që demokracia të vazhdonte të funksiononte në Shqipëri”, tha ambasadorja amerikane. /tesheshi.com/
