Ambasadorja e re amerikane në Tiranë Yuri Kim, mblodhi të enjten në mbrëmje figura politike e shtetërore, por me mungesën e dy kryesorëve, Ramës e Bashës, të cilëve kumtoi se ç’mision i bashkon, atë si amerikane e ata si shqiptarë.
“Ajo që na bashkon të gjithëve në këtë sallë është vendosmëria jonë e përbashkët që Shqipëria mund dhe duhet të çrrënjosë korrupsionin dhe të vendosë sundimin e ligjit në Shqipëri.
Të gjithë kemi një rol për të mundësuar sigurinë, begatinë dhe integrimin evropian të Shqipërisë”, tha Kim.
Ajo tha se ishte konsultuar me paraardhës të saj mbi atë se ç’shije u kishte lënë Shqipëria.
“Përpara se të nisesha nga Uashingtoni për në Tiranë, shfrytëzova rastin për t’u këshilluar me shumë prej ambasadorëve të mëparshëm amerikanë në Shqipëri. Nga Bill Ryerson te Jim Jeffrey e Donald Lu, të gjithë kishin një gjë të përbashkët: afeksion të thellë, që do të thoja një dashuri për Shqipërinë dhe një besim të thellë në marrëdhënie SHBA-Shqipëri”, theksoi Kim.
Ambasadorja e re përcaktoi tre prioritete të misionit të saj, duke e vënë theksin te 2020-ta si vit me mundësi të mëdha. Dhe te to, theksoi aspektin ekonomik, atë dhe Grenell e thekson fort për rastin e të ardhmes mes Kosovës dhe Serbisë
“Është e qartë se viti 2020 do të jetë një vit i rëndësishëm për Shqipërinë, i mbushur me sfida por edhe mundësi.
Prioriteti im i parë është ta ndihmoj Shqipërinë të bëhet aleate më e aftë e NATO-s dhe një bastion më i fortë sigurie.
“Së dyti, ne do të vazhdojmë të mbështesim fort zhvillimin demokratik të Shqipërisë. Ne duam ta shohim Shqipërinë të luajë një rol më të fortë në familjen evropiane të demokracive.
Së treti, duam të rrisim mundësitë e biznesit si për kompanitë amerikane ashtu edhe ato shqiptare. Ka shumë potenciale të pashfrytëzuara në Shqipëri, për prodhuar, konsumuar dhe për të qenë novatorë”, theksoi Kim, duke vijuar:
“Cila është lidhja? Të tria këto kërkojnë që Shqipëria të çrrënjosë korrupsionin, të ndjekë penalisht krimin e organizuar, dhe të realizojë vendosmërisht sundimin e ligjit. Miratimi i Reformës në Drejtësi ishte një gur kilometrik madhor, por shumë do të varet nga zbatimi i plotë dhe i duhur”. /tesheshi.com/
.
