Zëvendëspresidenti amerikan Joe Biden gjendet në Ankara për një vizitë zyrtare. Një vizitë e shumëpritur pas përpjekjes së dështuar për grusht shteti, ndërsa marrëdhëniet mes SHBA-ve dhe Turqisë ndodhen në udhëkryq.
Çështja e ekstradimit të Fethullah Gylenit, por edhe qëndrimet amerikane pas 15 korrikut, e kanë mjegulluar aleancën midis dy vendeve.
Joe Biden ka shfrytëzuar konferencën e përbashkët për shtyp me kryeministrin turk, Binali Jıldırım, për të treguar se Turqia mbetet për SHBA-të një aleat i çmueshëm.
“Turqia nuk ka mik më të mirë se SHBA-të,” ka thënë Biden në konferencën për shtyp.
“Obama deshi që të vija në Turqi. Në këtë mënyrë, tha ai, i tregojmë të gjithë botës për rëndësinë e jashtëzakonshme që u japim marrëdhënieve midis dy vendeve.”
Vizitori i veçantë amerikan e ka mohuar plotësisht që autoritetet e vendit të tij të kenë patur më parë dijeni apo ta kenë mbështetur përpjekjen për grusht shteti.
“Nuk kemi pasur dijeni më parë, për asnjë çast nuk e kemi mbështetur; ne këtë lëvizje e dënuam menjëherë,” është shprehur Joe Biden.
“Presidenti Obama qe ndër të parët nga kryetarët e shteteve që e bëri të qartë mbështetjen për qeverinë turke,” ka shtuar ai.
“Jemi krah për krah, ashtu si përpara përpjekjes për grusht shteti. Jo vetëm me qeverinë turke, por dhe me popullin turk,” ka qenë një prej mesazheve të Biden-it.
Duke prekur temën më të nxehtë të ditës në marrëdhëniet midis dy vendeve, atë të kërkesës për ekstradimin e Fethullah Gylenit, Joe Biden ka thënë se ekspertët ligjorë amerikanë po punonin së bashku me homologët turq, e se po vlerësoheshin të gjitha provat. Ai u angazhua për një ndjekje ligjore të kërkesës për ekstradim të personit të akuzuar nga Turqia për grushtin e shtetit.
Joe Biden kujtoi se presidenti Obama nuk ka fuqi për të ekstraduar ndokënd. “Vetëm një gjykatë amerikane mund ta bëjë këtë!”
Nga ana e tij, kryeministri turk, Binali Jıldırım, e ka prekur po ashtu çështjen e ekstradimit të Gylenit, duke nënvizuar se shpejtimi i këtij procesi dhe shtimi i bashkëpunimit në këtë pikëpamje do të ndihmonin në përmirësimin e atmosferës së marrëdhënieve dypalëshe.
“As përpjekja për grusht shteti e 15 korrikut, as ndonjë problem tjetër, nuk duhet t’i dëmtojë marrëdhëniet midis Turqisë dhe SHBA-ve,” ka vënë në pah shefi i qeverisë turke.
Yıldırım e ka bërë të qartë gjithashtu se dy vendet janë të një mendimi se militantët e PYD-së në veri të Sirisë nuk duhet të përparojnë në perëndim të Eufratit.
Kryeministri turk ka deklaruar se nuk do të lejohet krijimi i një entiteti të ri kurd në Siri, e se duhet ruajtur integriteti territorial i vendit. /tesheshi.com/
