Presidenti serb Aleksandar Vuçiç, u ka bërë thirrje serbëve të qëndrojnë në Kosovë, pasi tha se do mbështeten ekonomikisht dhe në aspekt të sigurisë, ndërsa ka lëshuar mesazhe paqeje me shqiptarët.
“Serbët duhet të qëndrojnë dhe të mbijetojnë në Kosovë ndërsa shteti i Serbisë duhet të vazhdojë t’i ndihmojë.
Unë erdha për t’u treguar shqiptarëve se Serbia jo vetëm që dëshiron paqe, por do të bëjmë çmos për ta ruajtur atë dhe për të zgjidhur mosmarrëveshjet. I porosisë shqiptarët, edhe pse kemi shpesh mosmarrëveshje, se ne duam që të gjejmë një zgjidhje të mirë për të dyja palët, për të mirën e serbëve në Kosovë dhe për të mirën e shqiptarëve”, tha Vuçiç para gazetarëve pasi vizitoi vizitoi Manastirin e Banjskës.
Ai ka folur edhe rreth vrasjes së liderit serb të Kosovës, Oliver Ivanoviç, për çka ka kërkuar që sa më shpejt të zbardhet vrasja e tij, ndërsa ka ritheksuar Serbia ka kërkuar të merr pjesë në hetime.
“Njerëzit tanë janë shumë të mërzitur me vrasjen e fundit kriminale të Oliver Ivanoviçit. Ne do të shohim se si do të kryhen hetimet. Ne do të shkëmbejmë informata, pasi që unë shoh se ata po flasin për shkëmbimin e informacionit, edhe pse kemi kërkuar të marrim pjesë në hetim, por nuk do të presim të mësojmë nga gazetarët. Do shikojmë nëse rezultatet përfundimtare të hetimit do të na dërgojnë tek kryerësit e krimeve të neveritshme në Mitrovicë. Nëse kjo nuk ndodh, atëherë shumë gjëra do të jenë më se të qarta për ne”, tha ai.
Vuçiç më pas ka vënë lule para vendit ku u vra Ivanoviç.
Vizita e Vuqiçit po vjen në një kohë mjaft të tensionuar të marrëdhënieve Kosovë-Serbi. Dialogu në Bruksel është ndërpresë me kërkesën e Serbisë deri në zbardhjen e vrasjes së Ivanoviçit. /tesheshi.com/
