Mesazhe (mos)pajtimi nga PD: ndërrohen dyert, por jo Berisha!

Në PD po jepen mesazhe bashkimi pas çarjes së madhe, e cila prodhoi dhe incidente të rënda, siç më 8 janar. Dorëheqja e Bashës, pas një humbjeje të rëndë të radhës më 6 mars, në votimet për 6 bashki, ka bërë që palët të kërkojnë pajtim.

Kështu, në këtë kuadër, në selinë demokrate po hiqen dyert e hekurta, për t’u zëvëndësuar me ato normale, estetikisht dhe funksionalisht. Thirrja erdhi në mbledhjen e fundit të Kryesisë, drejtuar nga kryetari i komanduar Enkelejd Alibeaj.

Pra, që një bashkim i mundshëm me kahjen tjetër, Rithemelimin, të niste që nga heqja e dyerve të blinduara në seli.

Berisha e komentoi kështu këtë zhvillim:

“Unë gjykoj se brenda grupit parlamentar mund të zhvillohet çdo debat, mund të diskutohet për çdo gjë. Sikundër dua të theksoj dhe ftoj miqtë e mi të mos harrojmë: Bashizmi ishte doktrinë e dhunimit të statutit, institucioneve dhe parimeve të partisë. Ai u arkivua bashkë me dorëheqjen e Lulzim Bashës. Askush nuk mund të mendojë të paraqesë sikur ekzistojnë dy parti demokratike. Ekziston vetëm një dhe vetëm një parti demokratike”, tha Berisha.

Por në krahun tjetër, atë zyrtar, në krye të së cilit është një ndër anti-berishistët më të ashpër, Alibeaj, Berisha mbetet i panegociueshëm: duhet të tërhiqet dhe ai që të mundësohet bashkimi. Por kjo, gjykuar nga qëndrimet e Berishës, vështirë se mund të ndodhë. /tesheshi.com/