Pak pasi presidenti Meta sulmoi Reformën në Drejtësi, e bashkë me të dhe ndërkombëtarët që e avokojnë atë në pikën e mbetjes së vendit përkohësisht pa Gjykatë Kushetetuese, ambasadorja gjermane në Tiranë, vendi nga u ngjiz reforma në fjalë, e ka vlerësuar atë.
Sussane Schütz, teksa ka folur mbi mbështetjen gjermane për hapjen e negociatave, ka theksuar se “qeveria gjermane dhe parlamenti gjerman do të marrin vendimin e tyre për hapin e ardhshëm të integrimit të Shqipërisë në BE, domethënë hapjen e negociatave të pranimit në BE.
Unë jam e bindur se Shqipëria tashmë ka ndërmarrë hapa të rëndësishëm në drejtimin e duhur. Për shembull, reforma e drejtësisë, e cila dallon edhe në krahasim me progresin e bërë në këtë fushë në vendet fqinje”.
E nga ana tjetër ajo ka kritikuar qëndrimin e opozitës, e cila ka lënë institucionet e dalë në rrugë.
“Polarizimi i thellë politik dhe bojkoti i institucioneve demokratike dhe i proceseve vendimmarrëse, megjithatë, kanë ngadalësuar ndjeshëm procesin e reformave dhe nuk kanë qenë aspak të dobishme në avancimin e vendit në rrugën e saj të integrimit në BE. Unë jam i sigurt se këto zhvillime janë ndjekur nga afër edhe nga ata aktorë të jashtëm që kanë interes në këtë rajon”, tha ajo. /tesheshi.com/
