Nëse është në natyrën e familjes mbretërore të dërgojë mesazhe, fotografia e Princit të Uellsit në një tank pranë kufirit rus është një nga më të drejtpërdrejtat që ata kanë dërguar ndonjëherë, raportoi BBC të premten.
Princi William ka mbërritur në Estoni për të mbështetur ushtrinë britanike në atë që tani është angazhimi i saj më i madh operacional jashtë vendit – duke mbrojtur shtetin baltik nga një kërcënim rus.
Të premten, në një terren trajnimi ushtarak të ftohtë dhe me baltë, princi vizitoi ushtarët dhe pajisjet ushtarake që mbrojnë krahun lindor të NATO-s.
Princi, me uniformë kamuflazhi, duke shikuar nga një tank Challenger 2 dhe më pas nga një mjet luftarak i blinduar, dërgoi një sinjal të angazhimit të Britanisë për të zmbrapsur çdo agresion rus.
Gjatë qëndrimit të tij dyditor në Estoni, Princi William vizitoi rreth 900 ushtarë britanikë që shërbenin si pjesë e kësaj force shumëkombëshe.
Princi u dërgua në një poligon stërvitor ushtarak në kampin Tapa, i cili është pjesë e Operacionit Cabrit, kontributi i Britanisë në “sigurinë dhe mbrojtjen kolektive” të NATO-s në këtë rajon të cenueshëm të Balltikut.
Princit, i cili mbante një distinktiv të NATO-s në uniformën e tij, iu shfaq trajnimi në terren i grupit të betejës dhe u takua gjithashtu me ushtarë estonezë dhe francezë. /tesheshi.com/
