Ambasada Amerikane në Tiranë shpërndau së fundi një deklaratë, të shkurtër por me peshë në mesazh, duke i dalë në mbrojtje procesit të vettingut, i cili vijon të kontestohet, më së shumti politikisht, edhe prej atyre që e kanë pësuar, prokurorë e gjyqtarë të shkarkuar.
“Shtetet e Bashkuara janë angazhuar që të shohin procesin e vetingut në Shqipëri të vazhdojë me profesionalizëm dhe përkushtim”, thuhet në fjalinë e parë të deklaratës, ku e dyta është potencimi i faktit se procesi është nën monitorimin e tyre, kështu që s’ka si të jetë i padrejtë.
“Me dy vendet tona në bordin e ONM-së – një për Departamentin e Shtetit & një për Departamentin e Drejtësisë – për monitorimin e procesit të vetingut dhe nëpërmjet vëzhguesit tonë ndërkombëtar, ne sigurohemi që organet e vetingut të respektojnë ligjin”, përfundon deklarata.
Ajo vjen dy ditë pasi Komisioneri për Zgjerim vizitoi komisionin e vettingut, duke e vlerësuar maksimalisht atë.
Kujtojmë se vettingu është një ndër kolonat kryesore të Reformës në Drejtësi, aq shumë të kontestuar e sulmuar nga një pjesë e politikës, por gjithnjë e mbrojtur fort nga ndërkombëtarët. /tesheshi.com/
