Dy deputetë nga Bundestagu gjerman, Peter Bauer dhe Christian Schmidt, u deklaruan hapur kundër idesë së këmbimit të territoreve mes Kosovës dhe Serbisë, një tezë e Thaçit e përcjellë me togfjalëshin “korrigjim kufijsh”, duke konfirmuar qëndrimin e Berlinit se është kundër kësaj teze. Ata ndodhen në Prishtinë dhe pas takimi me kryeministrin Haradinaj, po ashtu një kundërshtar i flaktë i tezës së Thaçit, u shprehën:
“Kjo ide do të krijonte shumë probleme që nuk do ta prekte vetëm Kosovën por gjithë rajonin”, tha Schmidt.
“Ne nuk jemi këtu vetëm në vizitë zyrtare, por jemi tek miqtë tanë, sepse populli i Kosovës janë miq të gjermanëve. Sigurisht ne kemi biseduar edhe për proceset e ardhshme, edhe për dialogun që e mbështetim dhe se duhet të vazhdohet. Po ashtu kemi hapur edhe temën për shkëmbimin e territoreve të cilën ne e kundërshtojmë në çdo aspekt”, tha Bauer.
Më pas qe Haradinaj i cili kumtoi: “Ju shpreha falënderim për kancelaren Merkel. Ne jemi Kosovë dëshirojmë të jemi Kosovë, po ashtu jemi Evropë dhe dëshirojmë t’i bashkohemi Evropës”. /tesheshi.com/
