Presidenti amerikan dhe ai turk do të kenë në fund të kësaj jave një takim dypalësh gjatë zhvillimit të tubimit të G20-tës në Kinë.
Në takimin e lënë për më 4 shtator, Obama kërkon të diskutojë me Erdoğan-in mbi situatën në Turqi pas grushtit të shtetit, mbi fushatën ushatarake ndaj ISIS-it, si dhe mbi mënyrat e nxitjes së stabilitetit në Siri.
“Presidenti Obama do të dojë të diskutojë situatën në Turqi që nga grushti i shtetit, fushatën tonë kundër ISIS-it, dhe përpjekjet tona për të nxitur stabilitet më të madh në Siri dhe për t’iu përgjigjur krizës së refugjatëve,” u tha gazetarëve zëvendëskëshilltari i Sigurisë Kombëtare, Ben Rhodes.
Ky do të jetë takimi i parë i dy udhëheqësve që pas përpjekjes së dështuar për grusht shteti në Turqi.
Takimi vjen menjëherë pasi Uashingtoni e ka këshilluar Turqinë të fokusohet te lufta ndaj ISIS-it në Siri, e të shmangë përplasjen me Forcat Demokratike Siriane, që udhëhiqen nga YPG-ja. Ankara e quan këtë të fundit një degë siriane të PKK-së, organizatës terroriste kurde. Turqia kërkon tërheqjen e saj në lindje të Eufratit, duke mos pranuar që YPG-ja të ketë nën kontroll pjesën perëndimore të tij.
Nuk bëhet e ditur nëse në takimin dypalësh do të diskutohet dhe ekstradimi i Fethullah Gylenit nga SHBA-të, diçka që Turqia e kërkon me ngulm./tesheshi.com/
