Me jetën në zgrip, si pasojë e një përkeqësimi shëndëtesor, ish-lideri historik socialist Fatos Nano ka marrë një vlerësim tokësor nga njeriu që ai e futi në politikë, pasuesi Edi Rama.
Ky i fundit i ka dhënë një titull të lartë të “Mirënjohes Publike” njeriut me të cilin edhe u deshën edhe u grindën, por që vitet e fundit kanë patur një stinë ngrohjeje e miqësie të vërtetë me njëri-tjetrin. Ketë vlerësim, Rama e ka shoqëruar dhe me një dedikim.
“Në këto orë të vështira të luftës për jetën, lideri historik i Partisë Socialiste dhe njeriu që vuajtjen e padrejtë të heqjes së lirisë e ktheu në burimin e një fryme liberale në udhëheqje, në një kohë kur Shqipëria përballej me shëmtinë e egër të një konflikti politik të nxitur nga shpirti i hakmarrjes, padijes, errësirës dhe me egërsinë e pakufishme të një kapërcimi të madh historik, nga izolimi i tejskajshëm komunist drejt demokracisë si sprovë e tejmundimshme, në një tokë të djegur prej zjarrit e hekurit të perandorive e regjimeve që pasuan njëri-tjetrin qysh prej pavarësimit të Shqipërisë, ku nuk u rrit dot kurrë shtati institucional i shtetit e ku liria e ardhur me furinë e zemëratës popullore solli bashkë me dritën e së ardhmes edhe plagët e tmerrshme të shkatërrimit të shumëçkaje në emër të luftës për demokraci, meriton sot lutjet tona dhe mirënjohjen tonë për gjithçka të mirë mundi t‘i japë vendit dhe shoqërisë në rolet e rënda që pati gjatë karrierës së tij me të përpjeta e të tatëpjeta të mundimshme”, shkruan Rama.
Por kujtojmë: njeriu që ia pamundësoi Nanos që të bëhej president, një ambicie e tij pas rënies nga pushteti në 2005-ën, ishte pikërisht Edi Rama. /tesheshi.com/
