Operacionet policore në Paris këtë të mërkurë në mëngjes po raportojnë Abdelhamid Abaaoud, një burrë me kombësi belge, si kokën kryesore të organizimit të sulmit terrorist në Francë, të premten që lamë pas.
Sipas raportimeve të medieve franceze dhe Reuters, dy personat e dyshuar janë vrarë gjatë sulmit të policisë dhe pesë të tjerë ndodhen në paraburgim. Ndërkohë, policia vijon punën për kapjen e të dyshuarve të tjerë.
Abaaoud është rritur në kryeqytetin Bruksel, në lagjen Molenbeek-Saint-Jean. Policia belge ka kryer bastisjen e kësaj lagje dhe e ka kontrolluar atë pëllëmbë më pëllëmbë, pas identifikimit të Abaaoud si një nga terroristët e masakrës së Parisit, ku 129 persona u vranë dhe qindra të tjerë u plagosën.
Një burim i paidentifikuar është shprehur për AP se ai ‘është truri që qëndron pas shumë sulmeve terroriste të planifikuara në Europë” ndërsa kishte planifikuar një tjetër sulm mbi një tren të shpejtësisë së lartë në Francë, i cili u arrit të parandalohej.
Abaaoud ka luftuar në Siri dhe është përdorur nga ISIS si një postier për të ‘reklamuar’ aktivitetin e këtij grupi xhihadist edhe në vendet e tjera të Europës, me qëllimin e bashkimit të sa më shumë personave me xhihadin.
Në nisje të këtij viti, revista e propagandës së ISIS publikoi një intervistë me Abaaoud, ku përshkruhej tentativa dhe planet e tij për të organizuar sulme në Europë: “Ne kaluam muaj duke u munduar të gjenim një rrugë për në Europë dhe me ndihmën e Allahut arritëm të futeshim në Belgjikë. Arritëm të krijojmë bazat tona dhe të siguronin armë”.
Sipas Associated Press, Abaaoud i mbushi mendjen edhe vëllait të tij të vogël 13-vjeçar për ta shoqëruar në Siri. Younes Abaaoud la Belgjikën dhe udhëtoi për në Siri, ndërsa nga Daily Mail u përshkrua si “Xhihadisti më i ri i ISIS” në muajin gusht.
Në bazë të profilit të tij të publikuar nga New York Times, Abaaoud është përbuzur nga familja e vet, anëtarët e së cilës ishin të lumtur kur dëgjuan raportimet një vit më parë se ai ishte vratë në Siri. Sipas NYT, motra e tij, Yasmina shprehet: “ne u lutëm që Abdelhamid të kishte ndërruar jetë me të vërtetë. I ati shton: “ai na shkatërroi familjen. Nuk dua ta shikoj kurrë më “.
Profili i tij në NYT tregon se Abaaoud ka mësuar në shkolla prestigjioze katolike kur ishte ende fëmijë. Ja çfarë shkruhet në NYT:
“Abaaoud shfaqte interes për vjedhjet dhe drogën në moshë të re, sesa për Islamin, i cili të mëson të tjera rregulla. Anëtarët e familjes nuk e mbështesnin në aktivitetet e tij keqbërëse. I ati, Omar, është pronar i një dyqani veshjesh në Molenbeek, një provincë në afërsi të Brukselit, dhe e gjithë familja jeton në rrugën Rue de l’Avenir — Future Street, pranë stacionit të policisë lokale.
Pavarësisht sjelljeve të tij të mëvonshme, Abaaoud ka shijuar disa privilegje që kanë emigrantët, përfshirë ndjekjen e një shkolle prestigjioze katolike, Collège Saint-Pierre d’Uccle, në një zonë shumë të rëndësishme të Brukselit”.
Ende nuk është e qartë nëse Abaaoud është një nga terroristët e vrarë gjatë sulmeve në Paris apo është arrestuar nga policia e po mbahet në Saint-Denis./tesheshi.com/
