Napoli e ka rinisur aty ku e la kampionatin italian, duke fituar në fushën e vështirë të Atalantës. Skuadra e Sarrit ka luajtur sipas stilit të saj, me shumë pasime e me vertikalizime nga krahët. Sulmuesi belg Mertens ka shënuar për napoletanët, të cilët më pas administruan rezultatin. Hamsik shënoi një tjetër gol në fund të ndeshjes, por arbitri e anulloi për pozicion jashtë loje.
Përvec hakmarrjes për eleminimin nga Kupa e Italisë dhe avantazhit provizor prej 4 pikësh nga Juventus, tek Napoli pati dhe një moment të pakëndshëm, kur trajneri Sarri zëvendësoi Insigne, i cili polemizoi për ndërrimin. Por “i rrepti” Sarri e këshilloi të mbyllë gojën e të mbajë vendin.
Në ndeshjet e së dielës, ra në sy edhe fitorja 5-1 e Lazios ndaj Chievo, ku “celestët” shënuan shumë edhe pa sulmuesin kryesor Immobile, që u dëmtua në 20 minutat e para të ndeshjes.
Sampdoria gjithashtu fitoi një përballje të fortë ndaj Fiorentinës, 3-1, ku shkëlqeu i pamplakshmi Qualiarella, shënoi 3 herë. Fitore me shumë vlera arriti edhe Crotone, që fitoi në fushën e një kundërshtari direkt, për arritjen e mbijetesës, si Hellas Verona. 0-3 për miqtë, ishte një superfitore për miqtë. /tesheshi.com/
