Drajs Mertens po çmend Napolin. Belgu ka shënuar një tjetër gol të rrallë në ndeshjen e së mërkurës kundër Lacios, duke e çuar në 6 numrin e golave në kampionat, në 5 ndeshje të luajtura.
Por goli që i shënoi portierit shqiptar Strakosha, ka bërë që napoletanëve tu kthehet në memorie, një gol i ngjashëm që ka shënuar idhulli i tyre Maradona, pikërisht kundër Lacios.
Për këtë shkak, por edhe për tjetrin se Mertens po shënon rregullisht, tifozët e quajtën Diego Mara…Mertens. E të mendosh se deri rreth një vit më parë, belgu ishte një mesfushor i avancuar krahu, e rezervë e rregullt e Insinjes në sulm.
Por roli i ri që trajneri Sarri i dha, edhe për shkak të “hallit” që e zuri se iu dëmtuan sulmuesit, e bëri 29-vjeçarin të shpërthejë, a thua e ka bërë “pykën” në sulm, gjatë gjithë jetës.
Vetë Maradona ka shprehur superlativa për Mertens, duke e konsideruar atë si armën fituese të Napolit të sotëm. Ndërsa belgu, ia dedikon trajnerit Sarri, faktin që shënon në vazhdimësi, e që Napoli argëton dhe argëtohet në fushën e lojës.
Mertens shënoi me një parabël të kalibruar të mërkurën, kur portieri kishte dalë nga porta për ta ndaluar. Pa e parë topin, por duke llogaritur daljen e Strakoshës, belgu goditi me kthesë topin që përfundoi në rrjetë. Kuriozë u bë shumëkush edhe për xhestin që ai bëri pasi shënoi, duke imituar sikur pinte një gotë ujë.
“Bëra sikur piva ujë dhe këtë mënyrë festimi e kemi praktikuar edhe me miqtë. Më pëlqen të bëj xheste idiote e gallate, kur shënoj gola”, ka qenë përgjigjja e thjeshtë e 29-vjeçarit. /tesheshi.com/
