Pas një marrëveshje politike mes PD-së e PS-së më në fund Kuvendi i hapi sot udhë Vettingut të drejtësisë duke miratuar komisionet ad-hoc. Vetoja kundër vettingut e vënë nga PD-ja u hoq pas një marrëveshje me kryeministrin Rama, nga e cila mori gjysmën e qeverisë dhe disa drejtues agjencish e institucionesh të rëndësishme.
Vettingu në drejtësinë shqiptare nis udhëtimin e tij sot në darkë pasi opozita vendosi të votojë më në fund këtë proces që nisi një vit më parë me këmbënguljen e fortë të ndërkombëtarëve. Marrëveshja e 18 majit mes Edi Ramës dhe Lulzim Bashës pas 3 muajsh bojkoti të Kuvendit dhe bojkoti të zgjedhjeve nga opozita u kthue buzëqeshjen të gjithëve sot.
Nga entuziami i kryeministrit i cili kishte thyer kodin e veshjes në Kuvend duke shkuar me një t-shit me shqiponjë të kuyqe, ku shkruhej “Shqipëria që duam”, e deri tek entuziazmi i Berishës që i quante xhelozë të gjithë ata që ishin kundër marrëveshjes të cilën ai e cilësoi një “ëin-ëin story” ( një histori fitoreje të dyanshme).
Kësaj seance ia prishi qetësinë dhe dashurinë vetëm Ben Blushi, duke e cilësuar marrëveshjen si një Pazar të hapur politik mes palëve dhe duke shprehur mosbesim në vetingun e drejtësisë që do të bëjnë të mëdhenjtë,
Rama tha se ishte i emocionuar nga kjo seancë dhe pse iu desh të ngrinte kartonin për shkarkimin e 6 ministrave dhe zv/kryeministrit të tij duke pranuar në kabinet ministrat e opozitës.
“Kemi punuar dhe kemi luftuar shumë për t’ia dalë dhe dua tu them se e kam pritur shumë këtë moment kur do dilja nga dera e parlamentit dhe do tu thoja shqiptarëve që vettingu do të fillojë, që gjykatësit dhe prokurorët e korruptuar i kanë ditët e numëruar dhe që tanimë reforma në drejtësi nuk ndalet. Është një moment edhe personalisht shumë emocionues sepse të bën të thuash me plot gojën se politika është vërtet një forcë për mirë kur përdoret për qëllime të mira dhe ato që bën politika në të mirë të njerëzve nuk i bën asgjë tjetër, natyrisht kur mendon për të mirë të njerëzve”- tha Rama.
Sot u ngriten 3 komisione me numër të barabartë anëtarësh mes mazhorancës dhe opozitës, të cilët do të bëjnë verifikimin e kandidatëve për anëtarë në institucionet e rivlerësimit dhe do të përzgjedhin anëtarët e komisioneve të rivlerësimit. Këta emra, të cilët kanë kaluar në filtrin e ndërkombëtarëve do të rivlerësojnë pasurinë dhe figurën e prokurorëve dhe gjyqtarëve.
Ben Blushi, i vetmi opozitar
Si rrallëherë në Kuvendin e sotëm ka pasur një sinergji mes dy kundërshtarëve kryesorë politikë, PS e PD, dhe vetëm ish-deputeti socialist Ben Blushi ka qenë zëri opozitar.
Blushi e denoncoi marrëveshjen politike si një pazar të Rilindjes me çadrën. Sipas Blushit, PS me këtë pakt futi në gjirin e saj kriminelin e fundit, Sali Berishën.
“Të dy palët keni ardhur në një dasëm, sapo votuat një qeveri të përbashkët dhe thojuani shqiptarëve cila është arsyeja që ju çoi në bashkëqeverisje. Është për të qeshur, por dhe për të qarë. Pas 27 vitesh, pas shumë kacafytjesh, sharjesh, shtyrjesh dhe vjedhjesh Sali Berisha me Edi Ramën i kemi sot në një qeveri. Jeni bashkë apo jo? Saliu qesh, e di që i pëlqen kjo gjë, të jetë në qeveri me rilindjen. Më në fund e realizoi.U fut në çadër tre muaj si heroi i republikës së re. Dhe si dolët nga çadra, ca si elektriçistë tek OSHEE, sa ci drejtorë burgjesh, ca si njerëz që shpërndajnë tapi hipotekash. Këto morët, OSHEE, burgjet, hipotekat. Me çfarë i ndatë këto? Me rilindjen. Kjo është çadra e rilindjes. Dhe ju që nuk latë banditë, kriminelë, edhe vrasës pa futur në rilindje, ju kishte mbetur vetëm një pa futur, Sali Berisha. E futët dhe Saliun në çadër, komplimentet e mia.Duhet tua thoni shqiptarëve pse erdhët deri këtu. Keni bërë ndonjë pakt sot për interes kombëtar? Ka Shqipëria sot më shumë punë për shkak të kësaj marrëveshje, ka më pak të varfër, ka drita më të lira, funksionon më mirë OSHEE, ka më pak njerëz nëpër burgje, ka më pak kanabis? Asgjë. Ka një pakt mes çadrës dhe rilindjes për të ndarë pushtetin në mes”- tha ndër të tjera Blushi.
Blushit iu kundërpërgjigj kryeministri Edi Rama, kreu i grupit demokrat Edi Paloka dhe më pas edhe Berisha duke e shpallur si të vetmin ‘armik’ të marrëveshjes në atë sallë.
Berisha, leksion xhelozie e dashurie në Kuvend
U duk sikur kjo seancë do të ishte e veçantë dhe për një arsye tjetër, në të nuk do të kishim një fjalim të ish-kryeministrit Sali Berisha, i cili duhet pranuar që është deputeti më aktiv në Kuvend. Por përmendja e emrit nga ana e deputetit Blushi e nxori dhe sot në foltore, ku harroi akuzat ndaj kryeministrit si kryefjala e tij këto 4 vite parlament, e zgjodhi të mbante një fjalim psikologjik mbi dashurinë dhe xhelozinë.
“Nuk do të komentoj marrëveshjen pasi ajo është një ‘ëin-ëin story’ dhe kam bindjen më të thellë për këtë. Jam mjek, dhe asgjë nuk më shqit nga ndjenjat dhe psikologjia. Duke të dëgjuar tu konstatoj një shpërthim xhelozie të papërmajtur. Si mjek do të shpjegoj, si psikolog, xhelozia është sentimenti që lind në dashuri dhe i cili prodhohet nga frika se personi i dashuruar preferon ta shtijë dikë tjetër. Këshilla ime, po njerëz jemi ne, me ndjenja, këshilla ime prapë medikale për ty është kjo.. Se më përmallove Blush kur citove Nolin, aty më përmallove. E kuptova që ka filluar me tu duk vetja dhe Fan Nol.Tani këshilla: Mos harro asnjëherë, është e vërtetë që dashuria lind xhelozinë, por xhelozia shkatërron dashurinë. Prandaj me karar se qëllimi yt është të kthehesh aty nga dole”./tesheshi.com/
