Një nga aktivitetet sportive më të ndjekura sot në botë ka humbur drejtuesin legjendar, njeriun që do ta shndërronte tërësisht atë.
Formula 1 nuk do të ketë më për drejtues një njeri si Bernie Ecclestone, i mirënjohur po aq sa çdo kampion bote në këtë sport.
Në moshën 86-vjeçare, ai është larguar, për të patur vetëm rolin e këshilltarit, dhe vendin e tij do ta zërë gjigandi amerikan Liberty Media.
“Unë u hoqa. Kjo është zyrtare. Unë nuk e drejtoj më kompaninë,” tha Ecclestone dje për gjermanen Auto Motor und Sport.
Tashmë në moshë të thyer, por akoma energjik, Bernie Ecclestone do të niste në vitet ’70 të shekullit të shkuar të përfaqësonte kolegët në negociatat në lidhje me këtë sport, qoftë me televizionet, me autoritetet ku kryheshin garat, e me vetë drejtuesit e pistave të ndryshme. Dalëngadalë ai do ta merrte gjithçka vetë në dorë, për të patur një pozitë absolute në Formula 1.
Merita e tij kryesore është kthimi i këtij sporti nga periferik në një prej veprimtarive sportive me përcjelljen më të madhe televizive në botë. /tesheshi.com/
