Ahmet Davutogllu i ka dhënë fund sot qeverisjes së tij dyvjeçare në krye të qeverisë turke. Kryeministri i ri i vendit e ka marrë detyrën prej tij në një ceremoni që ka zgjatur për rreth 90 minuta.
Binali Jëlldërëm është vënë sot zyrtarisht në krye të qeverisë së 65-të të Turqisë. Posti i kryeministrit pason atë të kryetarit të Partisë për Drejtësi dhe Zhvillim. Jëlldërëm u zgjodh të dielën si drejtuesi i ri i AKP-së në kongresin e saj të dytë të jashtëzakonshëm.
Kryeministri i ri ka mbajtur më herët një fjalim para grupit parlamentar të partisë së tij, ku edhe njëherë i ka mëshuar nevojës së ngutshme për një kushtetutë të re.
Ndërsa janë mësuar emrat e ministrave në qeverinë e re, të formuar pa ndryshime të mëdha në postet kyçe, është vijuar me shpalljen e programit qeveritar.
Ndër themeluesit e AKP-së, Binali Jëlldërëm ka qenë një prej ministrave më jetëgjatë në qeveritë e krijuara nga kjo parti. Ai e ka mbajtur postin e ministrit të Trannsportit në qeveritë e kryesuara nga Abdullah Gyl, Rexhep Tajjip Erdogan dhe Ahmet Davutogllu. /tesheshi.com/
