Giampiero Ventura do të jetë trajneri i ri i kombëtares italiane me të mbaruar Euro 2016-ta. Kjo është ajo çka pritet të deklarohet sot nga drejtuesit e futbollit italian.
Vetë presidenti i federatës italiane të futbollit, Carlo Tavecchio, e ka pohuar faktin se këtë të martë do të mësohet emri i trajnerit të ri, që, pa ndonjë surprizë të minutës së fundit, pritet të jetë Ventura.
Tekniku deri tash i Torinos qe përmendur edhe më herët si kandidati kryesor për këtë post, por për arsye ende të panjohura emërimi i tij u shty para do kohësh.
Ventura do të zëvendësojë Antonio Conte-n, që do të marrë drejtimin e skuadrës angleze të Çelsit menjëherë pas Europianit.
Kontrata do të jetë dyvjeçare, me një mundësi për ta zgjatur atë dhe për dy vite të tjera. Kualifikimi për në Botërorin e Rusisë, të 2018-tës, do të jetë objektivi i parë i Ventura-s.
Shuma e paguar për punën e tij do të sillet te 1.3 milionë euro në sezon, por nuk do të ketë shpërblim për kualifikimin për në Botëror.
Prej pesë vitesh te Torino, ai do të sjellë në drejtim të kombëtares italiane tërë ekipin e tij ndihmës. 68-vjeçari ka një karrierë të gjatë në fushën e trajnimit në Itali, por gjithmonë ka drejtuar skuadra të nivelit të mesëm apo më poshtë. /tesheshi.com/
