Kampionët e Italisë kanë finalizuar transferimin më të bujshëm deri tani të kësaj vere, duke i rrëmbyer Napolit golashënuesin më të mirë të Serisë A.
Gonzalo Higuain është tashmë zyrtarisht një lojtar i Juventusit, duke lënë pas tre vite të kaluara te Napoli, 146 ndeshje të luajtura me napolitanët, e 91 gola të shënuar.
Lojtari 28-vjeçar ka nënshkruar një kontratë katërvjeçare me Juventusin, e do të marrë 7 milionë euro në vit.
Skuadra torineze do ta paguajë në dy këste shifrën prej 90 milionë eurosh për blerjen e lojtarit, ndërsa Higuain është regjistruar si një lojtari i Juventusit.
Transferimi i tij nuk është pritur aspak mirë nga tifozët napolitanë, që e kanë parë këtë largim si një tradhti ndaj klubit. Vetë ish-legjenda e Napolit, argjentinasi Diego Armando Maradona, është shprehur se nuk arrin ta kuptojë këtë vendim të lojtarit.
Higuain u bashkohet katër blerjeve të tjera të Juventusit, Pjanic-it, Pjaca-s, Benatia-s dhe Dani Alves-it. Me këto përforcime, e mbase dhe me prurje të tjera gjer në fund të gushtit, Juventusi ka si synim parësor këtë sezon suksesin në Champions League. /tesheshi.com/
