Kancelarja gjermane gjendet sot në Stamboll, ku dhe është takuar me kryeministrin turk, Ahmet Davutogllu, me të cilin ka biseduar kryesisht për zgjidhjen e krizës së refugjatëve, por edhe në lidhje me një sërë çështjesh të tjera.
Merkel dhe Davutogllu kanë dhënë një konferencë të përbashkët shtypi, ku dhe i kanë bërë të qarta opinionet e tyre.
Kryeministri turk ka shprehur gatishmërinë e vendit të tij për të bashkëpunuar me Gjermaninë në parandalimin e emigracionit ilegal, por ka nënvizuar se kriza e refugjatëve nuk mund të zgjidhet pa një zgjidhje të konfliktit sirian.
“Kriza e refugjatëve nuk është krizë vetëm e Turqisë, Gjermanisë apo BE-së. Ajo është një krizë globale, që vjen prej ndasive mes pesë anëtarëve të përhershëm të Këshillit të Sigurimit të OKB-së,” ka theksuar Davutogllu.
Në të njëjtën kohë ai ka ripërsëritur kërkesën për një zonë të sigurt, “Formimi i një zone të sigurt, për të parandaluar refugjatë të tjerë prej Halepit të Sirisë pas një sulmi të bashkërenduar, është i detyrueshëm.”
Pjesë e bisedimeve mes kancelares gjermane dhe autoriteteve turke është dhe plani i fundit i BE-së për refugjatët në formën e një oferte për Turqinë. Megjithatë, kjo ofertë është pritur ftohtë deri tani nga shtetarët turq, që nuk kanë munguar të shprehin mospëlqimin për të. /tesheshi.com/
