Pas vizitës së kryeministres britanike, Theresa May, në Turqi ditë më parë, është kancelarja gjermane që do ta vizitojë sot Ankaranë.
Ajo pritet të takohet me presidentin e vendit, Recep Tayyip Erdoğan, si dhe me kryeministrin Binali Yıldırım.
Në krye të axhendës së bisedimeve të kancelares gjermane me mikpritësit do të jetë marrëveshja për refugjatët e Turqisë me BE-në, por gjithashtu nuk do të mungojë sigurisht dhe diskutimi i marrëdhënieve dypalëshe.
Do të diskutohet gjithashtu dhe situata në Siri, çështja e Qipros, bashkëpunimi brenda NATO-s, etj.
“Bisedimet do të mbulojnë një numër çështjesh, përfshirë zbatimin e mëtejshëm të marrëveshjes për refugjatët midis BE-së dhe Turqisë, situatën në Siri, çështjen e Qipros, bashkëpunimin brenda NATO-s, si dhe çështjet dypalëshe midis Gjermanisë dhe Turqisë,” njoftoi dje në një konferencë shtypi në Berlin zëdhënësi i kancelares, Steffen Seibert.
Ai e vuri theksin në peshën e Turqisë, si një partner me rëndësi të skajshme për gjermanët dhe për europianët në përgjithësi.
“Turqia mbetet një partner tejet i rëndësishëm për ne gjermanët, si dhe për europianët.”
E sotmja do të jetë vizita e gjashtë e kancelares Merkel në Turqi brenda tre viteve, si dhe e para pas grushtit të dështuar të shtetit në korrikun e shkuar. /tesheshi.com/
