Mikhail Gorbachev, lideri i fundit i Bashkimit Sovjetik që vdiq dje në moshën 92-vjeçare, “shkroi historinë e botës” dhe “ndryshoi rrënjësisht jetën time”, tha ish-kancelarja gjermane Angela Merkel, e cila u rrit në ish-Gjermaninë Lindore.
“Ai tregoi me shembullin e tij se si një politikan i vetëm mund ta ndryshojë botën për mirë,” vuri në dukje ish-liderja e Gjermanisë në një deklaratë veçanërisht prekëse që ajo bëri teksa lavdëronte ish-udhëheqësin e ndjerë. “Mikhail Gorbachev gjithashtu ndryshoi rrënjësisht jetën time. Nuk do ta harroj kurrë.”
Pa “guximin” e liderit të fundit të BRSS, “kryengritja paqësore në RDGJ (Republika Demokratike Gjermane) nuk do të ishte e mundur”, nënvizoi Merkel.
“Edhe sot mund të ndiej sërish frikën që ndjeva me shumë njerëz në RDGJ në 1989, atë të mos dijes nëse tanket do të rikthehen si në vitin 1953, kur bërtisnim ‘Ne jemi populli’”, kujton ish-kancelarja, duke iu referuar demonstratave në Gjermaninë Lindore nga qytetarët kundërshtarë të regjimit komunist.
“Megjithatë këtë herë – ndryshe nga viti 1953 – nuk u lëshuan tanke, nuk u shkrep asnjë e shtënë. Përkundrazi, Mikhail Gorbachev iu drejtua udhëheqjes së vjetër të RDGJ me frazën ‘Jeta ndëshkon të ardhurin e vonuar’”.
“Për më tepër, ai lejoi një Gjermani të ribashkuar të bëhej anëtare e NATO-s,” kujtoi ajo.
“Nuk i kam harruar pamjet e takimit të tij me kancelarin Helmut Kohl në Kaukaz në vitin 1990, i cili bëri të mundur ribashkimin e Gjermanisë në paqe dhe liri”, vëren Merkel, 68 vjeç, e cila ishte kancelare gjermane nga viti 2005 deri në vitin 2021.
“Kujtimi i arritjeve të tij historike le të lejojë një pauzë, veçanërisht në këto javë dhe muaj të tmerrshëm të luftës së Rusisë kundër Ukrainës,” përfundoi Merkel. /tesheshi.com/
