Vizita e kancelares gjermane Merkel qe paralajmëruar prej ditësh, e vjen në kuadër të dhënies së mbështetjes për marrëveshjen mes BE-së dhe Turqisë për refugjatët.
Merkel u prit në aeroportin e Gaziantepit nga kryeministri turk, për të zhvilluar bashkë me të, me presidentin e Këshillit Europian, Donald Tusk, e me zëvendëspresidentin e Komisionit Europian, Frans Timmermans, një vizitë në kampin e refugjatëve në Nizip, ku janë strehuar mbi 5.000 të larguar nga Siria.
Gaziantepi është një qytet pranë kufirit turk me Sirinë, i kthyer në strehë për mijëra sirianë që i kanë ikur dhe i ikin luftës në vendin e tyre.
Zëdhënësi i qeverisë gjermane, Steffen Seibert, do të deklaronte një ditë më parë se financimi i projekteve për refugjatët në Turqi do të ishte në qendër të vëmendjes gjatë vizitës, duke bërë të ditur në të njëjtën kohë se tre zyrtarët e lartë planifikonin të vinin në lëvizje një projekt për familjet e refugjatëve dhe fëmijët e tyre.
Ashtu siç e pohoi dhe zëdhënësi gjerman, kalimi ilegal i refugjatëve drejt Greqisë përmes Egjeut ka pësuar rënie të ndjeshme që prej nënshkrimit të marrëveshjes së 18 marsit midis BE-së dhe Turqisë.
Në Turqi gjendet aktualisht afër tre milionë refugjatë sirianë.
Një konferencë e përbashkët për shtyp është në axhendë në universitetin e qytetit, ndërsa janë marrë masa të jashtëzakonshme sigurie.
Vizita e kancelares gjermane dhe e zyrtarëve europianë zhvillohet në një kohë kur ndaj marrëveshjes mbi refugjatët ka patur kritika të mëdha. Prania e Merkelit në vizitën në kampin e refugjatëve konfirmon përkrahjen për marrëveshjen e për Turqinë. /tesheshi.com/
