Përpara një takimi të Bashkimit Europian këtë të enjte në Bruksel, kancelarja gjermane ka shfrytëzuar një fjalë të mbajtur në Dhomën e Ulët të Bundestagut për të kërkuar një përpjekje të përbashkët europiane për t’i dhënë zgjidhje krizës së emigrantëve, e njëkohësisht për të vënë në dukje rolin e Turqisë në këtë aspekt.
“Nuk ka dyshim se Turqia luan një rol kyç në këtë situatë,” është shprehur Angela Merkel. “Pjesa më e madhe e refugjatëve të luftës që vijnë në Europë udhëtojnë përmes Turqisë. Ne nuk jemi në gjendje ta rregullojmë e ta frenojmë lëvizjen e refugjatëve pa punuar së bashku me Turqinë.”
“Kjo përfshin dhënien më tepër mbështetje Turqisë në kujdesjen për refugjatët dhe në sigurimin e ndihmës humanitare, si dhe ndihmën për sigurimin e kufijve e për luftimin e bandave kriminale të trafikimit,” shtoi Merkel.
Në programin e takimit të sotëm në Bruksel është dhe diskutimi i rritjes së bashkëpunimit me Turqinë dhe me vendet e tjera në kufi me Sirinë për t’u përpjekur për t’i mbajtur në rajon refugjatët e panumërt.
Merkel do të jetë gjithashtu të dielën në Turqi, ku do të takojë zyrtarët më të lartë të vendit. Edhe pse shpesh mes Turqisë dhe Gjermanisë ka mospajtime në lidhje me çështje të ndryshme, të dy vendet kanë një komunikim të vazhdueshëm mes tyre. /tesheshi.com/
