Kancelarja gjermane Angela Merkel tha se ishte e prirur të përdorte vaksinën ruse kundër COVID-19 në Evropë, pas rezultateve pozitive shkencore mbi efektivitetin e saj.
“Të gjitha vaksinat e miratuara nga EMA (Agjencia Evropiane e Barnave) do të jenë të mirëseardhura, kjo është pikërisht ajo për të cilën fola me Presidentin rus Vladimir Putin,” tha kancelarja në televizionin shtetëror ARD, duke mirëpritur “të dhëna të mira shkencore të lëshuara të martën mbi vaksinën Sputnik V të Rusisë”.
Vaksina Sputnik V, për të cilën Rusia është akuzuar se nuk është mjaft transparente, rezultoi 91.6 përqind efektive kundër formave simptomatike të COVID-19, sipas rezultateve të botuara të martën në revistën mjekësore The Lancet dhe të konfirmuara nga ekspertë të pavarur.
Kjo do të thotë “që një vaksinë shtesë mund të bashkohet me luftën ndaj COVID-19”, këmbëngulën shkencëtarët.
Kancelarja gjermane gjithashtu “hapi dyert” për vaksinën kineze dhe theksoi se një vend si “Serbia vaksinohet më shpejt” sesa pjesa tjetër e Evropës me “vaksinën kineze”.
Qeveria e Angela Merkel është nën kritikë për ngadalësinë e fushatës së vaksinimit përballë vendeve si Britania e Madhe ose Shtetet e Bashkuara.
Zhgënjimi i popullatës po rritet për shkak të ngadalësisë së vaksinimit dhe për shkak të kufizimeve të lëvizjes, shkruan agjencia France Presse.
Përballë padurimit publik, kancelarja premtoi në kanalin ARD se ajo “nuk do të presë që e gjithë popullata të vaksinohet për të miratuar lehtësimin e masave”.
“Kjo nuk është rruga në të cilën duam të shkojmë”, tha Merkel.
Ajo u bëri thirrje gjermanëve që “të durojnë edhe pak kohë” dhe paralajmëroi për rreziqet e llojeve të ndryshme të COVID-19.
“Nervat janë të tensionuara, kemi një rrugë të gjatë për të bërë dhe më e vështira është në dimër,” tha Merkel, duke shtuar se Gjermania, e cila ka rreth 83 milion njerëz, do të vaksinojë 10 milion deri në fund të tremujorit të parë. /tesheshi.com/
