Kancelarja gjermane ka paralajmëruar për rrezikun e një rrëshqitjeje në nacionalizëm nëse nuk sigurohen kufijtë e jashtëm të BE-së karshi një vale tjetër të madhe refugjatësh.
Ajo u ka kërkuar të enjten udhëheqësve europian t’i mbrojnë kufijtë ose të përballen me rrezikun e kthimit të nacionalizmit.
Sipas saj, Europa duhet t’i mbrojë kufijtë e vet “nga Mesdheu në Polin e Veriut”, përndryshe do i duhet të vuajë pasojat politike.
Në një konferencë me kryeministrin italian, Matteto Renzi, Merkel ka kujtuar se lëvizja e lirë në Europë është e rrezikuar.
Vala e jashtëzakonshme e refugjatëve, e cila nuk ka të ndalur, ka bërë që në vendet europiane të shtohet mbështetja për lëvizjet e partitë e ekstremit të djathtë dhe kundër emigrantëve.
Fitorja e Norbert Hofer-it, kandidatit të ekstremit të djathtë, në raundin e parë të zgjedhjeve presidenciale në Austri, është shembulli më spikatës i terrenit të fituar nga politikanët ekstremistë në pjesë të ndryshme të Europës. /tesheshi.com/
