Bashkimi Evropian duhet të tregojë solidaritet të ndërsjelltë, të sigurojë që zonat më të prekura nga pandemia të marrin më shumë, ndërsa ato që janë ekonomikisht më të forta nuk janë të mbingarkuara, tha Kancelarja gjermane Angela Merkel të mërkurën në Bruksel.
Në një fjalim të fortë, pro-evropian në Parlamentin Evropian, ajo paralajmëroi se “kthimi i nacionalizmit nuk do të thotë të kesh më shumë kontroll, por më pak”.
Prandaj, BE duhet të veprojë së bashku, “ne duhet të sigurojmë që rajonet më të prekur nga pandemia e koronavirusit të marrin më shumë ndihmë pa u mbingarkuar”.
Ajo shtoi se “ne nuk duhet të jemi naivë”, dhe se është shumë vështirë që BE të dështojë.
“Pandemia e virusit koronar dhe zgjidhja e pasojave të saj do të shënojë presidencën gjermane,” tha Merkel, duke paraqitur përparësitë e presidencës në gjysmën e dytë të këtij viti.
Fillimi i Evropës
“Prioriteti kryesor i presidencës është që Bashkimi Evropian të dalë i bashkuar dhe i fortë nga kriza, jo vetëm në një afat të shkurtër, por ne duam një Evropë që ngjall shpresë. Ne duam të rifillojmë Evropën,” tha ajo.
Ajo theksoi pesë përparësi në të cilat Gjermania do të insistojë gjatë presidencës së saj: të drejtat themelore, kohezionin, mbrojtjen e klimës, dixhitalizimin dhe rolin e Evropës në botë.
Arritja në Bruksel dhe vizita në Parlamentin Evropian është udhëtimi i parë i kancelares Merkel jashtë Gjermanisë që nga fillimi i krizës. Më vonë pasdite, ajo do të marrë pjesë në një mini-samit me Presidentin e Këshillit Evropian Charles Michel, Presidenten e Komisionit Ursula von der Leyen dhe Presidentin e Parlamentit Evropian David Sassoli, duke u përqëndruar në planin e rimëkëmbjes dhe buxhetin shumëvjeçar të BE-së.
Javën tjetër, më 17 dhe 18 korrik, drejtuesit e shteteve anëtare do të mblidhen në samitin e parë fizik për të provuar të arrijnë një marrëveshje për këto çështje.
“Ne të gjithë duhet të jemi të gatshëm për të bërë kompromis, dhe kështu duhet të jemi në Parlamentin Evropian”, tha kancelarja Marrëveshja për planin e rimëkëmbjes dhe MFF kërkon pëlqimin e të gjitha vendeve anëtare dhe pëlqimin e Parlamentit Evropian.
Duke folur për të drejtat themelore, Merkel theksoi se pandemia e virusit koronar nuk duhet të jetë një justifikim për të kufizuar liritë.
“Një pandemi nuk duhet të përdoret kurrë si një justifikim për të shkelur parimet demokratike, të drejtat e njeriut, liritë civile,” tha Merkel, duke shtuar se ajo u rrit në një shoqëri ku të drejtat themelore ishin të kufizuara.
Solidariteti i ndërsjelltë
Ajo theksoi rëndësinë e kohezionit dhe solidaritetit të ndërsjelltë. “Evropa do të dalë më e fortë nga kriza nëse forcojmë kohezionin; solidariteti evropian nuk është thjesht një qasje humane, por është e dobishme për të gjithë,” tha ajo.
Ajo theksoi se BE do të përpiqet të arrijë një marrëveshje mbi marrëdhëniet e ardhshme me Britaninë e Madhe deri në fund të vitit, por që BE-ja duhet të jetë e gatshme për Brexit pa një marrëveshje.
Merkel tha se ajo do të punojë për të mbajtur konferenca të pranimit deri në fund të vitit, domethënë për të hapur negociatat e pranimit me Maqedoninë Veriore dhe Shqipërinë.
Presidentja e Komisionit Evropian Ursula von der Leyen falënderoi kancelaren Merkel dhe atdheun e saj, Gjermaninë për rivendosjen e frymës së unitetit në BE, një ndjenjë të tërësisë, që do të thotë se “ajo që është e mirë për Evropën është e mirë për pjesët e saj”.
Ajo theksoi nevojën e solidaritetit, i cili bart me vete përgjegjësi, dhe që Komisioni, pra, kishte propozuar në planin e tij të rimëkëmbjes për “gjeneratën e ardhshme BE” që ndihma të lidhej me reformat që Shtetet Anëtare duhet të zbatonin.
“Çdo anëtar duhet të bëjë detyrat e shtëpisë, të gjithë duhet të ndryshojmë për mirë”, tha Von der Leyen. /tesheshi.com/
