Kancelarja gjermane ka marrë përgjegjësinë për rezultatin e dobët në zgjedhjet në Berlin, në të dytën goditje të njëpasnjëshme elektorale për partinë e saj.
Në një fjalim këtë pasdite, ajo ka pranuar gabimet në trajtimin e krizës së refugjatëve të vitit të shkuar.
Merkel ka thënë se po luftonte për të garantuar mospërsëritjen e skenave kaotike në kufijtë e Gjermanisë, kur për një kohë, sipas pohimit të saj, ka munguar kontrolli i mjaftueshëm.
“Askush nuk dëshiron një përsëritje të situatës së vitit të shkuar, përfshirë mua,” do të thoshte kancelarja gjermane.
Ajo po ashtu nuk e ka mohuar se politika e dyerve të hapura për emigrantët ka qenë një faktor në rezultatin e dobët në zgjedhje.
Sidoqoftë, Merkel nuk është distancuar nga vendimi i saj shtatorin e kaluar për t’i mbajtur kufijtë të hapur për mijëra refugjatë të bllokuar në Budapest. Ajo e ka parë gabimin te shpejtësia jo e duhur për t’u përgatitur për një lëvizje masive të njerëzve prej konflikteve në Lindjen e Mesme.
Merkel do të pranonte se nuk e kishte shpjeguar aq sa duhej politikën e saj mbi refugjatët. /tesheshi.com/
