Kancelarja gjermane nuk ka bërë asnjë hap prapa, pavarësisht goditjes që mori partia e saj në zgjedhjet rajonale.
Merkel ka folur në Bundestagun gjerman, ku e ka mbrojtur fort politikën e qeverisë së saj për emigracionin.
“Situata sot është mijëra herë më e mirë se ç’ishte një vit më parë,” ka thënë kancelarja.
Ajo u ka kërkuar politikanëve ta frenojnë tonin armiqësor në debatin për refugjatët.
“Jam krejt e sigurt se nëse kafshojmë gjuhën dhe mbahemi pas së vërtetës, atëherë kemi për ta rifituar gjënë më të rëndësishme që na nevojitet, besimin e njerëzve,“ ka sugjeruar Merkel.
Kancelarja ka kujtuar se qeveria e saj ka marrë masa për integrimin e refugjatëve në shoqëri, si dhe për përmirësimin e sigurisë në vend.
Një pjesë e fjalës së saj i është kushtuar marrëveshjes së BE-së me Turqinë për refugjatët, duke e mbrojtur atë.
“Marrëveshja midis BE-së dhe Turqisë është në interes të dy palëve. Eshtë e drejtë që ne të luftojmë tregtinë ilegale të kontrabandimit të njerëzve. Që kur e kemi patur këtë marrëveshje, thuajse asnjë nuk është mbytur në Egje.”
Angela Merkel e ka çmuar marrëveshjen si një model për marrëveshje të ngjashme me vende si Libia dhe Tunizia.
Duke iu referuar rezultatit zgjedhor të Alternativës për Gjermaninë, kancelarja gjermane ka thënë se partitë tradicionale kanë një përgjegjësi të përbashkët në reagimin ndaj rritjes së të djathtës.
“AfD-ja është një sfidë për të gjithë ne…,” kanë qenë fjalët e Merkel-it para Bundestagut.
Ajo e ka bërë të qartë se nuk do ta ndryshonte kursin e politikës së saj. /tesheshi.com/
