Kancelarja gjermane Angela Merkel hodhi poshtë të enjten, pas takimit me Sekretarin e Përgjithshëm të NATO-s Jens Stoltenberg në Berlin, kritikat e Presidentit francez Emmanuel Macron në kurriz të udhëheqjes së Organizatës së Traktatit të Atlantikut të Veriut.
“Presidenti francez ka zgjedhur fjalë të rënda. Unë nuk jam dakord me këtë pikëpamje dhe mendoj se një sulm i tillë i rastësishëm nuk ka dobi për askënd”, tha ajo, duke iu përgjigjur kritikave ndaj Macron, i cili tha se NATO-s i mungonte bashkëpunimi midis SHBA dhe pjesës tjetër të aleancës. Ai e quajti NATO-n si “klinikisht e vdekur”.
Merkel sqaroi se partnerët e NATO-s “duhet të bashkohen” dhe t’i marrin çështjet në duart e tyre, por nuk vuri në dyshim forcën e Aleancës Transatlantike, sepse, sipas fjalëve të saj, “NATO mbetet një gur themeli i sigurisë”.
“Nga pikëpamja gjermane, pas bashkëpunimit transatlantik nuk ka asnjë alternativë tjetër,” tha Merkel, duke theksuar se ky bashkëpunim duhet të ushqehet aty ku është i suksesshëm dhe të kërkojë përmirësim atje ku nuk funksionon mirë.
Edhe Stoltenberg nga ana e tij kundërshtoi qëndrimin e presidentit francez dhe theksoi se NATO ishte “e fortë”.
“Çdo përpjekje për të distancuar Evropën dhe SHBA është e keqe edhe për Bashkimin Evropian. Ne duhet të forcojmë bashkëpunimin dhe kështu të forcojmë NATO-n”, tha ai. /tesheshi.com/
