Kancelarja gjermane Angela Merkel paraqiti idetë e saj për një integrim më të madh të Evropës, duke përfshirë krijimin e një agjencie të përbashkët refugjatësh që do të vendoste për aplikimet e azilit në kufijtë e kontinentit.
Në një intervistë me gazetën Frankfurter Zeitung Allgemaine, ajo tha se në kohën e ndryshimit të rendit botëror, Evropa “duhet të jetë në gjendje për të vepruar, si brenda ashtu dhe jashtë”.
Kancelarja gjermane theksoi se Evropa nuk mund të jetë krejtësisht e varur nga të tjerët dhe nuk duhet që ta lërë fatin e saj në duart e të tjerëve, duke aluduar për dallimet me presidentin amerikan Donald Trump.
Edhe pse është treguar e rezervuar ndaj kritikave të hapurura ndaj kreut të Shtëpisë së Bardhë, Merkel theksoi faktin se Shtetet e Bashkuara i shkelën traktatet ndërkombëtare duke futur tarifa të reja për importet e çelikut dhe aluminit ndaj vendeve të caktuara, duke përfshirë edhe Evropën.
Duke folur për qeverinë e re populiste në Itali, Merkel tha se qeveria e saj po i qaset me një mendje të hapur dhe se do përpiqet për të punuar me të pa u diktuar nga spekulimet rreth synimeve të saj.
Ajo shtoi se Gjermania ka një interes në ruajtjen e aftësisë së Evropës për të vepruar dhe potencuar zërin e saj në një kohë ndryshimesh të rendit botëror. /tesheshi.com/
