Agjencia e lajmeve AFP i ka bërë një përshkrim situatës ku gjendet kancelarja gjermane në përpjekjet e saj për t’i dhënë zgjidhje krizës së refugjatëve.
E braktisur nga Franca, e sfiduar nga Europa Lindore, ajo është një figurë e vetmuar në përpjekjen e saj për “solidaritet” të BE-së në lidhje me krizën e refugjatëve, thotë AFP-ja.
Vendet e Europës Lindore po planifikojnë pengesa të reja me tela me gjemba, e po ashtu Franca, aleatja më e ngushtë e Gjermanisë në BE, po tregon pak entuziazëm për politikën e mikpritjes së Merkelit, ndërsa ajo po lufton për një marrëveshje për shpërndarjen e refugjatëve anekënd Bashkimit Europian.
AFP-ja citon kryeministrin francez, Manuel Valls, të ketë deklaruar të shtunën se atmosfera në Francë nuk është e favorshme për thirrjen e Merkelit për një sistem kuotash të përhershme.
“Europa nuk mund t’i marrë të gjithë emigrantët nga Siria, Iraku apo Afrika,” citohet ai të ketë thënë për mjetet gjermane të informimit.
Po ashtu citohet kryeministri rus, Dmitry Medvedev, të jetë shprehur për të përditshmen Handelsblatt se, “politika europiane e emigracionit është një dështim i plotë.” Sipas tij, “është budallallëk t’i hapësh me të dyja kanatet dyert e Europës dhe të ftosh çdokënd që dëshiron të vijë në vendin tënd”.
Ndërkaq, Hungaria, Polonia, Çekia dhe Sllovakia kanë në plan të takohen sot për të diskutuar mënyrat e mbylljes së rrugës kryesore për refugjatët që kalon përmes Ballkanit.
“Për sa kohë nuk ka strategji të përbashkët europiane, është legjitime që vendet në rrugën ballkanike t’i mbrojnë kufijtë e tyre,” i ka thënë së përjavshmes gjermane Spiegel ministri i Jashtëm sllovak, Miroslav Lajcak.
Në kundërshtim të planit të Merkelit për një sistem kuotash, Lajcak do të theksonte se, “kuotat vetëm shtojnë nxitjet për emigracion”.
Turqia, po ashtu, ka paralajmëruar se durimit po i vjen fundi. Merkeli qe në fillim të javës së shkuar në Ankara, dhe duket se mes saj dhe autoriteteve turke është gjetur gjuha e përbashkët, por vala e fundit e refugjatëve në kufirin turk e ka bërë gjendjen të papërballueshme.
Numri i refugjatëve në Siri po shkon në tre milionë, çka e ka detyruar presidentit turk, Erdoganin, të deklarojë: “Do të jemi të duruar, por do të bëjmë sa të mundemi.” Ai ka lënë të kuptohet se, nëse nuk ka përmirësim të situatës, refugjatët në Turqi mund të lihen të vërshojnë në Europë.
Pakënaqësia ndaj Merkelit është e pranishme dhe në Gjermani, ku ka një presion të shtuar për t’i dhënë fund politikës së dyerve të hapura. Luftimet e shtuara në Siri, posaçërisht pranë kufirit me Turqinë, nuk premtojnë ditë më të mira në kuadër të krizës së refugjatëve, si për Europën, por edhe për Merkelin. /tesheshi.com/
