Kancelarja gjermane është detyruar të ndërpresë pushimet për të dalë në konferencë shtypi në Berlin pas sulmesh të ditëve të fundit në Gjermani e më tutje.
Dy sulmet e fundit në Bavari janë kryer nga azilkërkuesit, çka e ka shtuar presionin mbi Merkel-in për të ndryshuar diçka në politikën ndaj refugjatëve.
Merkel ka deklaruar se, pavarësisht sulmeve, Gjermania do t’u përmbahej parimeve të veta e do të vijonte t’u jepte strehë të persekutuarve. “Do t’u japim strehë dhe azil atyre që janë të persekutuar,” tha ajo para gazetarëve.
“Kam ndjesinë se po veproj me korrektesë dhe përgjegjësi,” u shpreh Merkel.
Me fjalët e saj, kryerësit e akteve të terrorit, “duan të minojnë ndjenjën tonë të bashkësisë, hapjen dhe gatishmërinë tonë për t’i ndihmuar njerëzit në nevojë.” “Ne e kundërshtojmë fuqishëm këtë.”
E sa për politikën e pritjes së emigrantëve, e për frazën e saj të njohura tashmë, “Ne mund ta bëjmë këtë,” ajo ka vënë në dukje, “Eshtë detyra jonë historike, dhe kjo është një sfidë historike në kohët e globalizimit. Ne tashmë kemi arritur shumë në 11 muajt e fundit.”
Gjithsesi, kancelarja gjermane ka propozuar masa të reja për shtimin e sigurisë në vend.
“Do të marrim masat e nevojshme dhe do të garantojmë sigurinë për qytetarët tanë. Kemi për ta marrë shumë seriozisht sfidën e integrimit,” do të shtonte Merkel. /tesheshi.com/
