Kancelarja gjermane Angela Merkel do të vizitojë Turqinë muajin tjetër për të nxitur Presidentin Rexhep Tajip Erdogan që t’i përmbahet paktin për migracionin me Bashkimin Evropian, njoftoi Sueddeutsche Zeitung, duke iu përgjigjur frikës se një konflikt në Siri mund të çojë në një valë të re refugjatësh.
Erdogan paralajmëroi të dielën se Turqia, e cila tashmë ka marrë rreth 3.7 milion refugjatë sirianë, nuk do të jetë në gjendje të përballojë valën e re të migrantëve.
Megjithatë, një zëdhënës i qeverisë gjermane nuk pranoi të konfirmojë sot raportin e Sueddeutsche Zeitung, raportoi Reuters.
Sipas Paktit të vitit 2015, Turqia ka pranuar refugjatët që lëvizin drejt Evropës në këmbim të mbështetjes financiare. Pak në qeverinë gjermane duan një përsëritje të krizës së migrantëve nga ai vit, kur Gjermania duhej të hapte dyert e saj për më shumë se një milion njerëz, shumica e të cilëve kërkuan strehim nga konflikti në Siri.
Sipas Reuters, numri i migrantëve kohët e fundit ka filluar të rritet përsëri me përpjekjet e Damaskut dhe Moskës për të kapur Idlibin, enklavën më të fundit të rëndësishme të mbajtur nga rebelët në Siri, ku banojnë rreth tre milion njerëz.
Erdogan tha të dielën se më shumë se 80,000 banorë kishin marrë rrugën drejt Turqisë. /tesheshi.com/
