Kancelarja gjermane Angela Merkel tha se Bashkimi Evropian do të bëjë çdo përpjekje për të shmangur një luftë tregtare me Shtetet e Bashkuara, por që dhe Uashingtoni duhet të bashkohet me të në këto përpjekje.
Administrata e presidentit Donald Trump ka vendosur tarifa për çelikun dhe aluminin e importuar nga Bashkimi Evropian dhe po shqyrton nëse do të vendosë tarifa edhe për makina, kamionë dhe pjesë ndërrimi.
“Ja vlejnë të gjitha përpjekjet e mundshme për ta zbutur këtë konflikt në mënyrë që të mos kthehet në një luftë të vërtetë tregtare, por sigurisht që ka dy anë në të”, tha Merkel gjatë një fjalimi në Bundestag.
Ajo shtoi se funksionimi i mirë i ekonomisë botërore varet nëse vendet do të punojnë së bashku si partnerë.
Por Shtetet e Bashkuara gjithashtu po ushtrojnë presion mbi Gjermaninë në kuadër të NATO-s, për atë që Trump e konsideron si investime të pamjaftueshme nga disa vende europiane.
Por Merkel tha se Gjermania ishte “një partner i besueshëm në NATO”, njoftoi AP. /tesheshi.com/
