Kancelaria gjermane Angela Merkel u ka bërë apel vendeve të G7, të cilët do të mblidhen sot në Gjermani, që të gjejnë 100 miliardë dollarë në mënyrë që t’ju vijnë në ndihmë vendeve të varfra, në kuadër të ndryshimit të klimës.
Në një videomesazh, Merkel ka thënë se “duhet t’ju japim një sinjal ndihme këtyre vendeve përpara konferencës klimës në Paris në muajin dhjetor”. Në konferencën mbi klimën, të mbajtur në vitin 2009 në Kopenhagen, qeveritë kishin rënë dakord për krijimin e një fondi prej 100 miliard dollarë, të cilat do të mblidheshin nëpërmjet financimeve publike dhe private, për të ndërhyrë dhe riparuar në vitet e ardhshme efektet negative të ndryshimeve klimatike në vendet e varfra.
Ndërkaq, pritet të ketë protesta nga ana e ambientalistëve. Mbi 10 mijë manifestues do të marshojnë në Garmisch-Partenkirchen, provincën më të afërt me Elmau, ku do të organizohet mbledhja e samitit të G7-ës, ditën e nesërme (e diel) dhe të hënën.
Që në orët e para të ditës së sotme, mbi një mijë manifestues janë mbledhur me tenda dhe çanta gjumi në nj fushë që rrethon qytetin, ndërsa nga i gjithë vendi po mbërrijnë aktivistë të tjerë me autobusë.
Organizatorët e ‘Stop Elmaù’ bëjnë me dije se protestat nuk do të jenë të dhunshme. Mbi 20 mijë policë janë pregatitur për të garantuar sigurinë e samitit, në të cilin do të jenë të pranishëm liderët e Shteteve të Bashkuara, Britanisë së Madhe, Kanadasë, Italisë, Francës, Japonisë dhe Gjermanisë. /tesheshi.com/
