Bashkimi Europian ka nevojë për një bashkëpunim më të ngushtë me Turqinë për të adresuar rrënjët e krizës së refugjatëve dhe për të mbrojtur më mirë kufijtë e tij të jashtëm.
Kancelarja gjermane, Angela Merkel theksoi kështu, ndërsa samiti i liderëve të BE-së do të diskutojë rrugën për gjetjen e zgjidhjes për krizën dhe ka në axhendë gjithashtu, bashkëpunimin dhe ndihmën më të madhe ndaj Turqisë, si vend që strehon më shumë se 2 milionë refugjatë sirianë.
“Askush nuk mund ta përballojë krizën i vetëm, as Turqia e as Greqia”, tha Merkel, duke shtuar se pa mbështetjen e Turqisë, veprimet e BE-së nuk do të funksionojnë.
Duke u fokusuar tek bisedimet mes Gjermanisë dhe Turqisë për krizën, kancelarja shpjegoi se ka pasur shumë takime e biseda së fundmi dhe se vendet do të përforcojnë kontaktet dypalëshe.
Presidenti I Këshillit Europian, Donald Tusk pritet të informojë liderët e BE-së për vizitën e tij në Turqi gjatë samitit të jashtëzakonshëm në Bruksel.
Sipas diplomatëve, Gjermania dëshiron të krijojë një dialog të strukturuar me Ankaranë për krizën e refugjatëve që përfshin bashkëpunim më të ngushtë për mbrojtjen e kufijve dhe ndihmë për refugjatët që strehohen në Turqi.
Turqia strehon aktualisht 1.9 milionë refugjatë sirianë dhe në pesë vitet e fundit ka shpenzuar 8 miliardë dollarë. Ajo disa herë ka kritikuar komunitetin ndërkombëtar për mungesë të ndihmës.
Sipas Merkel, BE duhet të fokusohet në shkaqet që qëndrojnë në rrënjë të zhvendosjes së njerëzve, të tregojë solidaritet me vendet më të prekura nga kriza, të forcojë kufijtë e jashtën dhe të ndërmarrë veprime ndaj trafikantëve të qënieve njerëzore.
Patrullimi më i mirë i kufirit mes Turqisë dhe Greqisë pritet të jetë pjesë e bisedimeve me Ankaranë. /tesheshi.com/
