Nga Blendi Gashi
Një tjetër lëvizje në merkaton politike pritet të ndodh në sallonet e politikës kosovare, pas kalimit të bujshëm të Donika Kadaj Bujupit në Vetëvendosje, duke e braktisur AAK-në në të cilën militonte.
Fjala është për treshen e ish-Vetëvendosjes, Ajnishahe Halimi, Arben Gecaj e Fatos Aliu që tashmë pjesë e “Fraksion +”. Sipas disa të dhënave e sinjaleve, ata çdo ditë e më tepër po afrohen me Partinë Demokratike të Kosovës që udhëhiqet tashmë nga kryekuvendari Kadri Veseli, pas shkuarjes së Thaçit në Presidencë si kreu i shtetit.
Ditë më parë është folur për një bashkim të mundshëm të Fraksion + me PDK-në, mirëpo kjo gjë nuk është konfimuar ende zyrtarishtë nga asnjëri subjekt.
Se ka një afrim mes PDK-së dhe ish anëtarëve të Vetëvendosje-s, e dëshmojnë më së miri edhe aktivitetet në terren ku përfaqësues të Fraksion + ditën e shtunë së bashku me gratë deputete të PDK-së kanë qëndruar për vizitë në kullën e Gecajve.
“Nga vizita e djeshme e një pjese të grave deputete të PDK-së dhe aktivistëve shoqërorë të rajonit të Dukagjinit në muzeun e Kullës Gecaj”. Këtë njoftim e bëri përmes statusit në Facebook Arben Gecaj, një nga njerëzit kryesorë të Fraksion +, i cili publikoi një foto nga vizita, ndërsa pranë tij qëndron kryetarja e grave të PDK-së, Justina Shiroka-Pula, si dhe deputetja Safete Hadërgjonaj, ndërkohë që në foto është edhe deputetja Blerta Deliu-Kodra.
Për të marrë një qëndrim dhe hequr dilemat në opinionin pubik pas raportimeve në mediat kosovare se Fraksion + është bashkuar me PDK-në, tesheshi.com kontaktoi me Arben Gecajn.
Por ky i fundit mohoi bashkimin me PDK-në, megjithëse nuk përjashtoi mundësinë që një gjë e tillë të ndodhë në një të ardhme.
“Jo nuk jemi bashkuar me PDK-në. Nuk kemi pasur asnjë takim zyrtaë me ta (drejtusit e PDK-së). Nuk përjashtohet asnjë opsion, por ne në Fraksion kemi vetëm një vendim dhe ai është se nuk do të inicojmë formimin e ndonjë partie politike. Unë kam miq në të gjitha partitë dhe shihem shpesh me ta. Të shtunën kishte një turne në Rrafshin e Dukagjinit dhe ndërkohë jemi pyetur; a mund të vizitojmë Kullën e familjes”, ka thënë Gecaj për tesheshi.com.
I pyetur për mundësinë e lidhjes së një koalicioni parazgjedhor me PDK-në, Gecaj ka thënë se nuk do të ndodh një gjë e tillë.
“Jo, nuk do të lidhim koalicion parazgjedhor. Jo, nuk më pëlqen kjo metodë, mua personalisht jo”, ka shtuar më tej Gecaj.
Kurse Ajnishahe Halimi, ka deklaruar më parë për mediat kosovare se me çdo parti mund të bashkohen, me përjashtim të Vetëvendosje-s.
“Ne si Fraksion kemi punuar për një vit dhe tash e tutje dhe më herët kemi filluar takime me institucionet shtetërore dhe në vazhdën e këtyre takimeve, kemi pasur takime edhe me udhëheqës institucionesh. Qëllimi i takimeve me udhëheqës institucionesh është që ne jemi përkrah institucioneve legjitime të shtetit sepse kanë dal nga vota e popullit. Ne si Fraksion Plus, kemi biseduar me të gjithë njerëzit që na kanë përkrahur dhe kemi ardhur në përfundim që ne duhet të negociojmë me të gjitha subjektet politike, përjashtim Vetëvendosjen”, ka deklaruar Halimi. /tesheshi.com/
