Klubet italiane “e kanë ndarë mendjen” që sezonin e ardhshëm të jenë protagoniste, qoftë në Seria A, qoftë në Europë.
Mbi të gjitha, ekipet nga Milano, të cilat kanë ndjerë nevojë urgjente të ndryshojnë diçka “tek vetja”.
Kështu “kampionët” e merkatos verore, Milani, ka konkluduar edhe blerjen e 8-të për sezonin e ardhshëm, duke sjellë në sulm kroatin Nikola Kaliniç të Fiorentinës.
Marrëveshja do të zyrtarizohet të enjten, por mediat italiane zbulojnë se ish-sulmuesi vjollcë, është blerë 25 milion euro, për 4 vite, me fitim vjetor 3 milion euro.
Ndërsa rivalët e Interit që gjithashtu këtë vit synojnë lart, janë duke mbyllur marrëveshjen për të afruar mbrojtësin Mangala nga Mancester City, pas “emergjencës” në repartin e tërhequr, që njoftoi trajneri Spaleti.
Juventus gjithashtu i ka dhënë fund hamendësimeve për një mesfushor qendre, duke nënshkruar me 30 vjecarin e PSG, Blaise Matuidi.
Francezi i fizikut të lartë është blerë për 20 milion euro dhe do t’i bashkangjitet në mesin e fushës, muskujve të Khedirës dhe trurit të Pjaniç.
E ndërkohë që merkato vazhdon të “ziejë”, italianët po shfaqen si klubet më aktive, duke tentuar, me sa duket, rikthimin dinjitoz mes më të mirëve të Europës./tesheshi.com/
