Nga Blendi Gashi
Ndonëse afati kalimtar për transferimin e sportistëve në ligat më të forta evropiane hapet në muajin janar, partitë politike në Kosovë tashmë kanë nisur të bëjnë “transferet”, kuptohet jo të futbollistëve, por siç thonë të “kuadrove” intelektuale.
Edhe pse zgjedhjet parlamentare janë të parapara të mbahen në muajin qershor të vitit 2018-të, kjo aspak nuk i pengon subjektet politike që të nisin “blerjet”, për të përforcuar radhët e tyre.
Goditjet e “mëdha” veç kanë filluar duke dhënë sinjal të qartë se zgjedhjet e përgjithshme janë të pashmangshme, andaj duhen “intelektualë të rinj”, jo pse ata i dëgjon kush, por për të thënë se partia e caktuar po rritet dhe kështu edhe do të rriten edhe në elektorat.
Partia Demokratike e Kosovës që udhëhiqet nga kryekuvendari Kadri Veseli, është e para nga partitë që tashmë ka prezantuar siç e quajnë një përforcim të “madh”.
Bëhet fjalë për ish-rektorin e Universitetit të Prishtinës, njëherit ish-nënkryetarin e partisë së Behgjet Pacollit, AKR-së, pra, profesorin Ibrahim Gashi.
Ky i fundit u largua nga pozita e rektorit pas protestave të organizuata ndaj tij pasi një nga punimet e Gashi e botoi në një revistë fals në Indi.
Ja pse Ibrahim Gashi nuk është prurje e re në PDK
Pavarësisht se kreu i PDK-së, Kadri Veseli, i organizoi një konferencë Ibrahim Gashit duke e prezantuar si prurje të re të partisë së tij, nëse shihen aktivitet e fundit të ish-rektorit, duhet thënë se kjo është e pavërtetë, jo vetëm për nga mosha por edhe nga pjesëmarrja në aktivitete.
Dy muaj pas dorëheqjes nga posti i rektorit, Gashi u pa të jetë tejet i lidhur me politikën, konkreitsht me PDK-në.
Gashi u pa tek bënte fushatë me ish kreun e PDK-së Hashim Thaçin dhe këtë parti në fshatin e tij të lindjes në Llapushnik të Drenasit, dhe figurat tjera të kësaj partie, Azem Sylën, Hajredin Kuçin etj
Por, se transferet politike bëhen kryekëput për interesa personale dhe jo që ndikojnë gjë në rritën e partisë e tregon më së miri rasti i Gashit.
Ish-nënkryetari i AKR-së, pesë vite më parë, PDK-në e kritikonte ashpër. Thoshte se PDK-ja ka ndikuar që të krijojë në edukim një sistem politik.
“Është i pashëm thellimi i politizimit në arsim, në politikën e pranimit të kuadrove, madje edhe të studentëve”, deklaronte Gashi sa ishte pjesë e AKR-së së Pacollit.
Por, kur tashmë është edhe zyrtarisht pjesë e PDK-së, ai thotë se është nder për të, të bashkohet në vizionin e lidershipit të partisë së Kadri Veselit dhe se do të angazhohet parreshtur në ndërtimin e mëtejmë të këtij vizioni.
Ai, në një intervistë dhënë për mediat kosovare ka thënë se zgjodhi PDK-në për ta vazhduar karrierën e tij politike për dy arsye: së pari, se PDK-në e konsideron parti kontribuuese të çlirimit, të pavarësimit dhe të konsolidimit të shtetit të Kosovës dhe, së dyti, pasi sot shumë çlirimtarë nga regjioni i Drenicës, që dhanë shumë për lirën dhe luftën, po akuzohen me akuza të sajuara.
Shtrohet pyetja çfarë kontributi dha dhe mund të japë Ibrahim Gashi, pë vlerat e luftës çlirimtare dhe mbrojtjen e tyre?
Vërtetë e vështirë të thuhet se Gashi mund të kontribuoi diç për ish-komandatët e UÇK-së, dhe për më tepër kur tashmë ata janë dënuar me ca vite burgim.
“Aderim për t’iu kundërpërgjigjur LDK-së pas marrjes së Ramiz Kelmendit”
Sigurisht arsyet pse Ibrahim Gashi iu bashkua PDK-së janë vetëm karrieriste dhe jo gjë tjetër.
Duke parë se është një person që është mësuar të ulet në kolltuke të ndryshme, pra është fjala në pozita shtetërore, mund të konkludohet se ai i është bashkuar PDK-së për të arritur deri tek një post shtetëror qoftë ministri, zv.ministri apo edhe ambasadori.
Përkundër kësaj, PDK dhe vet Ibrahim Gashi nuk është mirë të shesin moral kinse “bashkimi i tyre” ndodhi për të mirën e shtetit.
Parasëgjithash duhet theksuar se ky aderim po ndodh në një fazë kur zërat për shkuarje në zgjedhje të reja janë rritur tej mase dhe me gjasë, qytetarët në verën e ardhshme do t’iu drejtohen kutive të votimit.
Po ashtu është një kundërpërgjigje e PDK-së ndaj rivalit të saj më të madh LDK-së (e cila mori së fundmi biznesmenin Ramiz Kelmendi).
Megjithatë, duhet theksuar se të gjitha aderimet që bëjnë partitë politike në Kosovë kanë treguar se ato kryekëput ndodhin për interesa personale të caktuara, dhe kjo u dëshmua më së miri me bërjen e Ramiz Kelmendit zv.kryeministër vetëm dy ditë pasi ai u bë pjesë e LDK-së.
Padyshim se në ditët në vijim edhe partitë e tjera do të mundohet të sjellin “përforcime të mëdha”, në taborrin e tyre për t’iu hedhur hi syve qytetarëve se po marrin pranë tyre intelektual që do të kontribuojnë në rritën dhe zhvillimin e shtetit të Kosovës. /tesheshi.com/
