Nga Bashkim Kastrati
Sezoni i verës në Kosovë karakterizohet me ardhjen e shumë bashkatdhetarëve të cilët jetojnë dhe punojnë në vende të ndryshme të Kosovës. Ata i japin një gjallëri vendit. Por jo vetëm gjallëri me praninë e tyre fizike, por edhe me shpenzimin e parave që e bëjnë në Kosovë gjatë periudhës së pushimeve.
Ata punojnë gjatë gjithë vitit dhe një pjesë të parave të fituara i shpenzojnë gjatë pushimit në Kosovë, ku thonë se mezi presin që të vijnë gjatë verës.
Pra shikuar në aspektin ekonomik, ekonomia e brishtë e Kosovës e merr një “infuzion” dhe se ka rritje të qarkullimit të parasë.
Më të gëzuarit në këtë rast janë familjarët e tyre për prezencën fizike të tyre pasi edhe atyre u ndihmojnë financiarisht. Por më të fituarit dalin dyqanet e ndryshme dhe supermarketet, pasi që në këtë periudhë kohore fitimi i tyre është më i madh krahasuar me muajt paraprakë.
Tesheshi.com ka vizituar disa dyqane dhe ka biseduar me shitësit apo pronarët e tyre. Ata shprehën të kënaqur me fitimin që zakonisht e kanë në muajt korrik dhe gusht. Bashkatdhetarët për ta janë të mirëseardhur, ndërsa thonë se edhe çmimet nuk janë të shtrenjta dhe se nuk ndodh që të ketë fryrje të çmimeve, pasi për këtë gjë është folur herë pas here.
Samiu pronar i një dyqani të bizhuterive në Prishtinë thotë të jetë i kënaqur me shitjen që e bënë këto ditë dhe e pranon se në këtë periudhë ka rritje të theksuar të blerës së produkteve që ai shet dhe interesimit për blerje.
“Po ka shitje më shumë se zakonisht, i vërej që në këtë kohë më shumë vijnë në dyqan këta që jetojnë jashtë vendit dhe interesohen apo blejnë bizhuteri të ndryshme për vete, apo edhe për dhurata. Më së shumti kërkohen gjera si shenjat me flamur, unaza të ndryshme etj. Mund të them se kjo periudhë për ne shitësit është shumë e mirë pasi që na ndihmon të bëjmë bilancet vjetore dhe i falënderoj shumë e shyqyr që i kemi, se përveç familjeve të tyre edhe ne po ua shohim hajrin edhe ne tjerët”, thotë ai.
Gjithashtu edhe Blerimi pronar i një butiku në Prishtinë thotë se edhe në biznesin e tij ka ndikim ardhja e mërgimtarëve dhe se në këtë periudhë kohore shitja është më e madhe, pasi që bashkatdhetarët janë të interesuar që të blejnë rroba të ndryshme.
“Zakonisht sezoni korrik-gusht na del çdo vit më mirë në aspektin e shitjes, por edhe në përditshmëri e vërejmë se ka klientë më shumë që na vizitojnë dyqanin dhe sigurisht që ardhja e atyre që jetojnë jashtë vendit po e ka ndikimin e vet edhe tek bizneset e vogla për këtë arsye të gjitha këto lokalet afër e kanë zgjatur orarin e punës. Ne e kemi edhe një dyqan me gjëra më tradicionale dhe atje interesimi për të blerë është edhe më i madh ata zakonisht ia japin një gjallëri këtij vendi edhe rrugët dhe sheshet kanë një dinamikë tjetër gjatë kësaj kohe”, thotë ai.
Përveç dyqaneve dhe bizneseve të vogla, përfitime gjithashtu kanë edhe supermarketet, lokalet e natë, restorantet, pompat e bizneset, pra bizneset në përgjithësi e ndjejnë direkt ardhjen e bashkatdhetarëve.
Përveç shpenzimeve që mërgimtarët bëjnë për pushime në Kosovë, numri më i madh i tyre gjatë tërë vitit dërgojnë mjete për familjarët.
Mesatarisht 300 euro në muaj vlerësohet të jenë remitencat që qytetarët e Kosovës pranojnë nga diaspora.
Sipas të dhënave zyrtare, shuma e mjeteve të dërgesave të emigrantëve kosovarë që çdo vit hyjnë në Kosovë është rreth 600 milionë euro. /tesheshi.com/
