Komisioni Qendror i Zgjedhjeve ka publikuar të dielën listat e votuesve jashtë Kosovës.
Në këtë listë shihet se votuesit nuk janë vetëm shqiptarët që kanë shtetësinë e Kosovës dhe dëshirojnë të votojnë jashtë vendit, por edhe qytetarë të nacionalitetit serb.
Në total numri i tyre rezulton të jetë 14.808 persona.
Menjëherë pas publikimit të listës së votuesve jashtë vendit kanë filluar edhe ankesat dhe reagimet për mosgjetje të emrit në listë. Shumë aplikues nuk e kishin gjetur emrin në listë dhe nuk kishin marrë e-mail refuzues, gjë që u ka shkaktuar konfuzion.
Njëri nga ta është gazetari Enver Robelli, i cili ka shkruar në llogarinë e tij në “Facebook” në lidhje me këtë problem, duke e quajtur si “masakër burokratike të KQZ-së”.
Duke përmendur se në zgjedhjet e vitit 2010 ka votuar pa problem në Kosovë, ndërsa në zgjedhjet e vitit 2014 ka votuar pa problem nga jashtë Kosovës, ai është ndalur te zgjedhjet e 11 qershorit. Sipas asaj që ka shkruar në rrjetin social, Robelli ka plotësuar formularët për t’u regjistruar si votues, i ka dërguar me e-mail, por nuk i ka shkuar asnjë konfirmim.
“Deri më sot s’ka arritur asnjë konfirmim se KQZ ka pranuar aplikimin për t’u regjistruar si votues. Afati i regjistrimit ka qenë 22 maji. Ndërkohë pas kësaj date, pra pas skadimit të afatit, kanë ardhur me postë formularët për t’u regjistruar si votues. E sot qarkullon një regjistër i votuesve në botën e jashtme, ku nuk e gjen emrin fare. Unë si gazetar kam paksa mundësi të bëjë potere publikisht kundër KQZ-së. Por, qindra-mijëra njerëz të tjerë këtë mundësi nuk e kanë.
Dhe mbesin të përjashtuar nga gara demokratike. Kjo është njëra prej padrejtësive më të mëdha që po bëhet në këto zgjedhje”, ka shkruar Robelli.
Kujtojmë se edhe shumë mërgimtarë janë ankuar se po kanë probleme me sistemin për të aplikuar jashtë vendit, por KQZ është arsyetuar se kjo është kosto e organizimit të zgjedhjeve brenda një kohe të shkurtër./tesheshi.com/
