Të gjitha skuadrat e Formulës 1 i druhen Mercedes-it dhe në prag të nisjes së sezonit të ri. Mercedes-i mbetet pretendenti kryesor për titull, qoftë për konstruktorë, qoftë për pilotë.
Dhe nëse sezonin e shkuar ishte veç Lewis Hamilton në luftë për titull, finlandezi Valtteri Bottas nuk do të pranojë të qëndrojë spektator në vitin e dytë në timonin e një Mercedes-i.
Siç kanë bërë shumë skuadra ditë më parë, sot është zbuluar Mercedes-i i ri, një W09, për të cilin Hamilton ka deklaruar se është më e mirë në çdo aspekt se makina e vitit të shkuar.
“Makina e vitit të shkuar ishte fantastike, por kishte ca gjëra që ne mund t’i përmirësonim. Kjo është një evoluim i asaj. Kjo është më e mirë në çdo aspekt se makina e vitit të shkuar. Ajo është përmirësuar për të bërë paraqitje edhe më të mira se një vit më parë.”
Njëvendëshja e re u bë e njohur në Silverstone, fillimisht nga Bottas, e pastaj nga Hamilton.
Funksionimi i W09-s do të jetë i mundur të çmohet më së pari javën e ardhshme, në provat parasezonale të Barcelonës. /tesheshi.com/
