Një akt dhune u ushtrua mëngjesin e kësaj të mërkure mbi avokatin e Berishës, Sokol Mëngjesi. Ngjarja ka ndodhur në zonën e ish-Bllokut në Tiranë, teksa ai ka qenë duke çuar fëmijën në kopësht. Flitet papraprakisht për tre persona që e kanë goditur në disa pjesë të trupit, siç thuhet, duke e “bërë për spital”.
Dhe vërtet ai ka përfunduar në duart e mjekëve për trajtim.
“Sot, rreth orës 08:50, në zonën e ish-Bllokut në Tiranë, persona ende të paidentifikuar kanë goditur shtetasin Sokol Mëngjesi, me profesion avokat. I dëmtuari është dërguar menjëherë në spital për dhënien e ndihmës mjekësore dhe ndodhet nën kujdesin e mjekëve. Gjendja e tij shëndetësore është e stabilizuar. Drejtoria Vendore e Policisë Tiranë dhe strukturat e Policisë së Shtetit janë angazhuar për identifikimin dhe kapjen e autorëve“, informoi sot policia e Tiranës
Gjithashtu, deri më tani nuk ka asnjë të dhënë se akti lidhet me mbrojtjen që ai i bën Berishës këto kohë, nën akuzë nga SPAK. Pra, nuk ka asnjë hipotezë se akti është me sfond politik.
Në një përshkrim të karrierës së Soklo Mëngjesit thuhet se ai është diplomuar në vitin 2004 në Fakultetin e Drejtësisë Democritus në Greqi. Po në Greqi, nga viti 2004 deri në vitin 2006 ka ndjekur Masterin Shkencor në të Drejtën Penale dhe Kriminalistikë, Fakulteti i Drejtësisë, Universiteti Democritus.
Në po të njëjtin universitet ka marrë edhe titullin Doktor i Shkencave Juridike në mars 2010.
Në korrik 2016, ka marrë titullin akademik Profesor.
Në Universitetin Democritus ku ka mbaruar studimet akademike, Mëngjesi ka qenë pedagog i Jashtëm në Departamentin e së Drejtës Penale në periudhën nëntor 2005 deri janar 2008.
Në periudhën shtatori 2004 deri janar 2008, ka punuar si asistent avokat pranë Av. Prof. Dr. Stefano Pavlu, në Selanik.
Sokol Mëngjesi ka qenë dekan në Fakultetin e Drejtësisë në Universitetin e Tiranës dhe prej 2010 është pedagog në Departamentin e së Drejtës Penale, Fakulteti i Drejtësisë në Universitetin e Tiranës.
Nga viti 2009, Mëngjesi ka marrë licencën e avokatit nga Dhoma Kombëtare e Avokatisë Shqipëri edhe në këtë pozitë është një prej mbrojtësve të ish-kryeministrit Sali Berisha. /tesheshi.com/
