Kreu i Partisë Demokratike Shqiptare, Menduh Thaçi dhe ish-anëtari i Këshillit Shtetëror Zgjedhor, Bedredin Ibrahimi të akuzuar për manipulime zgjedhore, kanë kërkuar anulimin e seancës së sotme gjyqësore në mënyrë që të përkthehen të gjitha materialet e lëndës edhe në gjuhën shqipe.
Në fillim të seancës të akuzuarit nuk kanë pranuar cilësimin e gjuhës shqipe vetëm si gjuhë amtare e të akuzuarve, por si gjuhë e dytë zyrtare, pas asaj maqedonase.
Anulimin e seancës e ka kërkuar edhe avokati i palës mbrojtëse, Elvir Iseni i cili insistonte që ai është angazhuar tek sot edhe nga Ibrahimi dhe i duhet kohë për ta përfaqësuar. Avokati e kërcënoi gjykatën se do të kërkojë përjashtim nëse nuk e respekton kërkesën e klientëve të tyre për të përkthyer materialet në shqip, jo mbi bazë të përkatësisë etnike, por si gjuhë zyrtare në institucione.
Ndonëse i kërcënuar, gjykatësi Ognen Stavrev nuk pranoi anulimin e plotë të seancës por kërkoi pauzë prej dy orëve derisa të përkthehen materialet. /tesheshi.com/
