I’u deshën 6 muaj që lideri i opozitës shqiptare në Maqedoni, asaj të PDSH-së, Menduh Thaçi të kuptojë se ka gabuar që paska nënshkruar Marrëveshjen e Përzhinos. Ai në një konferencë për mediume ka paralajmëruar dhe kërcënuar që është vetëm një hap larg që të marr vendim për tërheqje nga marrëveshja e Përzhinos, dhe të ndalojë dialogun ndërmjet katër liderëve partiak, meqë sipas tij në këto takime asnjëherë nuk është debatuar për çështjet që i tangojnë shqiptarët.
“Tash jemi shumë afër që të sjellim vendim që ta lëshojmë dialogun, dhe publikisht ti themi njerëzve, veçanërisht shqiptarëve që në këto takime asgjë nuk po debatohet për të drejtat e tyre dhe për një jetë më të mirë. Është njerëzore dikush që t’ju bind, të ju shtye që të nënshkruani diçka, mirëpo më konkrete dhe më njerëzore është që të pranoni se keni gabuar. Është shumë afër koha kur unë publikisht do them që gabova që nënshkrova marrëveshjen e Përzhinos, meqë asgjë nga ajo që është premtuar nuk është plotësuar”, ka deklaruar Menduh Thaçi.
Thaçi pranon se në gjithë procesin e negociatave ndërmjet katër liderëve dhe përfaqësuesve ndërkombëtar ka pasur rol konstruktiv, me të vetmin çëllim që t’i jepet fund krizës politike në vend. Mirëpo siç thotë ai, edhe përkundër këtij konstruktiviteti, deri tani asnjëherë nuk është përfill asnjë kërkesë e tyre, si nga partitë maqedonase, ashtu edhe nga faktori ndërkombëtar.
“Nuk është folur as për Marrëveshjen e Ohrit, e as për marrëdhëniet ndëretnike dhe keqpërdorimin e buxhetit me karakter etnik, edhe pse këto kanë qenë kërkesat tona që i kemi parashtruar në tavolinë. Ne gjithashtu kemi kërkuar që pjesë e marrëveshjes të jetë edhe regjistrimi aktiv i votuesve, mirëpo këto kërkesa nuk kanë kaluar. Andaj është e palogjikshme që të besohet se për 10 ose 15 ditë do të bëhet pastrimi i listave zgjedhore, nëse e dijmë që asgjë nuk është punuar në këtë drejtim qe dy muaj”, ka shtuar Thaçi.
Në fund Thaçi nuk është prononcuar nëse PDSH-ja do të marrë pjesë në zgjedhjet e parakohëshme që me shumë gjasë priten të mbahen me 24 prill. /tesheshi.com/
