Kreu i Partisë Demokratike Shqiptare, Menduh Thaçi, sot në pesë vjetorin e ndarjes nga jeta të ish-kryetarit të kësaj force politike, Arbën Xhaferri, bëri homazhe te varri i tij, në qytetin në Tetovë.
Para pesë viteve Xhaferi ra në gjendje kome për gati 7 ditë dhe shkak u bë një hemorragji cerebrale në tru, që pati mbrëmjen e 8 gushtit rreth orës 21:00 në banesën e tij në Tetovë.
Ish kryetari i PDSH-së vuante nga sëmundja e parkinsonit, që ishte edhe shkak për tërheqjen e tij nga aktivitetet partiake. Xhaferi lindi në qytetin e Tetovës më 24 janar të vitit 1948.
Xhaferi ka qenë deputet i Parlamentit të Maqedonisë që nga viti 1994. Ai synonte krijimin e një sistemi dydhomësh në institucionin ligjvënës. Në kohën e konfliktit të armatosur në vitin 2001, partia e tij ishte në pushtet.
Ai është një nga nënshkruesit e marrëveshjes së Ohrit, por me zvarritjen e zbatimit të saj, ai synonte një marrëveshje të re midis shqiptarëve dhe maqedonasve. Xhaferi njihej për opinionet filozofike gjatë paraqitjeve në media dhe është autor i shumë eseve dhe artikujve analitikë, pas tërheqjes nga politika aktive. /tesheshi.com/
